Сиёсатчи Алексей Навальнийнинг «Новичок» орқали заҳарланишида Россия ҳукумати айбдор. Бу ҳақда Навьалнийнинг минтақавий штаб тармоғи раҳбари Леонид Волков ўзининг Facebook’даги саҳифаси орқали маълум қилди.
«‘Новичок’ — бу Путин. Бу ‘дорихонада сақланадиган’ нарса эмас. Бу ишлаб чиқариш ва бутун дунёда тақиқланган субстанция. Скрипаллар заҳарланганидан кейин бу модда тасаввурдаги ва тасаввур қилиб бўлмайдиган барча тақиқланган рўйхатлардан жой олган. ‘Новичок’ — бу террорчилик акти. Бу жиноят жойига қон билан ёзиб кетиш ёки ‘Ярош визиткасиъдан зўрроқ», — деб ёзади Волков.
Унинг фикрича, Навальнийни ўлдириш режалаштирилган, бироқ бир қатор омиллар — ичкари ва ташқаридан улкан босим, С7 самолёти учувчисининг тўғри қарори, ижрочиларнинг омадсизлиги ва фақатгина тахмин қилиш мумкин бўлган ёки биз билмаган омиллар Алексей Навальнийнинг омон қолишига сабаб бўлди, дейди Волков.
«Мен ростдан ҳам жаҳон ҳамжамиятидан бошқа ҳеч ким, ҳеч қачон, ҳеч қандай шароитда Владимир Путинга қўл бермасликларини жуда хоҳлайман. Алал оқибат бу шунчаки хавфсиз эмас», — деб ёзади Леонид Волков.
Эслатиб ўтамиз, Алексей Навальний 20 августдан буён кома ҳолатида. Комадаги дастлабки икки кунни сиёсатчи Россиянинг Омск шаҳридаги клиникада ўтказди, шундан сўнг у Берлинга олиб кетилди. Сиёсатчининг сафдошлари ҳодисанинг бошидан буён унинг заҳарланганини айтиб келмоқда. Уларнинг гумон қилишича, россиялик шифокорлар сиёсатчининг организмида заҳар изини топиш қийин бўлиши учун уни атайлаб клиникада ушлаб турган ва кетишига рухсат бермаган бўлиши мумкин.
«Шарите» клиникаси шифокорлари Навальний етиб келганидан кейин икки кун ўтиб унинг холинестераза ингибиторлари гуруҳидан бўлган модда билан заҳарланганини маълум қилган.
Изоҳ (0)