«Россия BBC хизмати» Навальний Томскдан Москвага учаётган S7 самолётида заҳарланганидан кейин тез тиббий хизмат Омск касалхонасига олиб кетишидан олдин унга қандай ёрдам берилганини баён қилди.
Рейс йўловчиси Илья Агеевнинг маълум қилишича, самолёт Томскдан маҳаллий вақт билан соат 08:01 да учган. Навальний парвознинг дастлабки ярим соатидаёқ ўзини ёмон ҳис қилган. 08:30 да у ҳожатхонага борган ва у ерда 20 дақиқа атрофида бўлган. Соат 08:50 да Навальнийнинг тоби қочгани ҳақида стюардессалар хабар топган. Улар овоз кучайтиргич орқали йўловчилар орасида шифокор борми, деб сўраган. Борт йўловчилари орасида ҳамшира борлиги аниқланган. У Навальнийга тез ёрдам хизмати олиб кетгунча ҳушида ушлаб туришга ёрдам берган, деб маълум қилган S7 матбуот хизмати.
«Экипаж эълонидан бир мунча вақт ўтгач, Алексей бақириб, инграй бошлаган. Унга ҳақиқатан ҳам оғриётганди. У самолётнинг дум қисмидаги коридорда, борткузатувчилар учун хонада ерда ётарди. Аниқ нимадир демасди, фақат бақирарди», — дея ҳикоя қилган самолётнинг орқа ўриндиқларида ўтирган йўловчилардан бўлган Сергей Неженец.
Унинг айтишича, борткузатувчилар ва ҳамшира унга айнан нима қилишаётганини кўрмаган, лекин «Алексей, ич», «Алексей, нафас ол» деб такрорлашганини эшитган. Шунингдек, Неженецнинг тахминича, Навалнийнинг ошқозонини ювишган: сиёсатчига ичишни таклиф қилишган, кейин эса қусишга ўхшаш овоз эшитилган. Агеев Навальнийга осма укол ҳам қилишган деб тахмин қилган, лекин S7 матбуот хизматининг маълум қилишича, уларнинг рейсида осма укол йўқ.
«Омскга қўнганимиздан сўнг дарҳол шифокорлар гуруҳи (Омск аэропорти соғлиқни сақлаш маркази) самолётга киришди, машина бизни кутиб турган эди. Улар Алексейни кўздан кечирди ва ‘Бу бизнинг ҳолат эмас, зудлик билан реанимация керак’, деб айтди», — дейди Неженец.
Омск аэропорти соғлиқни сақлаш маркази бошлиғи Василий Сидорусь ҳам Навальний гапира олмаганини айтган. Самолёт бортида ошқозони ювилдими деган саволга «Ҳамма нарса қилинди», деб жавоб берган.
«Навальнийни тез ёрдам олиб кетиб, самолёт қолган йўловчилар билан Москвага қўнганидан кейин бортга полиция ходимлари ва фуқаролик кийимидаги одамлар кириб келди. Улар Навальний ўтирган жойдан бир неча қатор яқинда ўтирган йўловчилардан қолишни сўраб, қолганларига кетишга рухсат берди», — дейди Неженец.
Эслатиб ўтамиз, Алексей Навальний 20 августдан буён кома ҳолатида. Унинг аҳволи Томск—Москва йўналиши бўйича учаётган рейс вақтида оғирлашиб қолган, самолёт фавқулодда Омскка қўнганди. Комадаги дастлабки икки кунни сиёсатчи Россиянинг Омск шаҳридаги клиникада ўтказди, шундан сўнг у Берлинга олиб кетилди. Сиёсатчининг сафдошлари ҳодисанинг бошидан буён унинг заҳарланганини айтиб келмоқда. Уларнинг гумон қилишича, россиялик шифокорлар сиёсатчининг организмида заҳар изини топиш қийин бўлиши учун уни атайлаб клиникада ушлаб турган ва кетишига рухсат бермаган бўлиши мумкин.
«Шарите» клиникаси шифокорлари Навальний етиб келганидан кейин икки кун ўтиб унинг холинестераза ингибиторлари гуруҳидан бўлган модда билан заҳарланганини маълум қилган.
Изоҳ (0)