Украина Навальний заҳарлангани сабабли Россияга қарши санкциялар талаб қилмоқда

Украина Ташқи ишлар вазирлиги сиёсатчи Алексей Навальнийнинг заҳарланишини «Кремлнинг мухолиф сиёсатчини ғайриинсоний жазолаши» деб атади ва воқеага «тегишли равишда» чора кўришга чақирди. Бу ҳақда Meduza хабар бермоқда.

«Цивилизацияли дунёнинг фақат бир дадил позицияси ва қатъий қоралаши, шу жумладан санкциялар Россия ҳукуматини жиноятлар содир этишни тўхтатишга мажбур қилиши мумкин...», — дейилади Украина ТИВ баёнотида.

2 сентябрь куни Германия ҳукумати Навальний Россияда «Новичок»га ўхшаш модда билан заҳарланганини маълум қилган. Сиёсатчи даволанаётган «Шарите» клиникаси шифокорларининг сўровига биноан ўтказилган тестлар натижаларидан шундай хулосага келинган.

Германия канцлери Ангела Меркель Россия ҳукумати Навалний заҳарланиши билан боғлиқ «жиддий саволларга» жавоб бериши кераклигини айтди. Мухолиф сиёсатчига қилинган суиқасд Буюк Британия, АҚШ ва Францияни ҳам ғазаблантирди. Лондон Навальнийга нисбатан кимёвий қурол қўлланилишини «аблаҳона» иш деб атади. Вашингтон айбдорларга нисбатан молиявий чекловлар қўллашга ваъда берди. Франция Навальнийнинг заҳарланишини «ажабланарли ва масъулиятсизлик» деб атаган.

Европа комиссияси раҳбари Урсула фон дер Ляйен ва Европа Иттифоқи дипломатияси етакчиси Жозеп Боррель айбдорларни жавобгарликка тортишга чақирган. НАТО бош котиби Йенс Столтенберг эса жавоб реакцияси борасида альянс аъзолари билан муҳокама бошланганини билдирган.

Россия ТИВ эса Германия ҳукуматининг даъволари далиллар билан тасдиқланмаганлигини айтди ва Навалний билан содир бўлган воқеалар тўғрисида маълумот беришни истамаганлиги учун Берлинни танқид қилди.

Эслатиб ўтамиз, Алексей Навальний 20 августдан буён кома ҳолатида. Унинг аҳволи Томск—Москва йўналиши бўйича учаётган рейс вақтида оғирлашиб қолган, самолёт фавқулодда Омскка қўнганди. Комадаги дастлабки икки кунни сиёсатчи Россиянинг Омск шаҳридаги клиникада ўтказди, шундан сўнг у Берлинга олиб кетилди. Сиёсатчининг сафдошлари ҳодисанинг бошидан буён унинг заҳарланганини айтиб келмоқда. Уларнинг гумон қилишича, россиялик шифокорлар сиёсатчининг организмида заҳар изини топиш қийин бўлиши учун уни атайлаб клиникада ушлаб турган ва кетишига рухсат бермаган бўлиши мумкин.

«Шарите» клиникаси шифокорлари Навальний етиб келганидан кейин икки кун ўтиб унинг холинестераза ингибиторлари гуруҳидан бўлган модда билан заҳарланганини маълум қилган.