Австралия ҳукумати Facebook’га контент учун ОАВларга пул тўлаш мажбуриятини юкловчи қонунни қабул қилса, Facebook ва Instagram’нинг австралиялик фойдаланувчилари маҳаллий ҳамда халқаро янгиликлар билан бўлишиш имкониятидан маҳрум бўлади. Бу ҳақда ижтимоий тармоқ блогида маълум қилинди.
Мазкур қонун лойиҳаси июль ойида таклиф этилган. Унга кўра, Facebook ва Google Австралия ОАВларига уларнинг контентидан фойдалангани учун пул тўлаши, шунингдек, фойдаланувчилар фаоллиги ва ўз алгоритмлари иши тўғрисидаги маълумотларни тақдим этиши керак. Қонун лойиҳаси Австралия медиасини ҳимоя қилишга йўналтирилган.
«Бизда янгиликлардан тўлиқ воз кечиш ёки ОАВга контенти учун биздан ўзлари хоҳлаганча, бирор чеклов нархларисиз пул ундириш тизимини қабул қилиш йўли қолмоқда. Афсуски, бирор бизнес бундай ишлай олмайди», — дейди Facebook’нинг Австралия ва Янги Зеландиядаги ижрочи директори Уилл Истон.
Аввалроқ мазкур қонун лойиҳасидан Google ҳам норози бўлганди. Корпорациянинг маълум қилишича, ҳужжат Австралия ОАВларига қидирув тизими натижаларини бошқариш имконини бериб қўяди.
Канберра университети маълумотларига кўра, Австралиянинг камида 39 фоиз аҳолиси янгиликларни Facebook орқали ўқийди. Мамлакат ОАВлари реклама даромадларининг йўқолиши сабаб қийинчиликларда дуч келган. Уларнинг аҳволи пандемия сабаб ёмонлашган.
Изоҳ (0)