Россияда оммавий равишда COVID-19 коронавирус инфекциясига қарши биринчи вакцина билан эмлаш ишлари аввал режалаштирилгандек 5 сентябрдан бошлаб Москвада ўтказилади. Вакцина препарати шаҳар поликлиника ва шифохоналарига иш ҳафтаси охиригача етказиб берилади. Бу ҳақда Гамалея институти директори Александр Гинцбургга таяниб «Интерфакс» хабар қилган.
«Ҳаммаси режа бўйича бормоқда. 3–4 сентябрь кунлари етказиб беришни таъминлаймиз. Машиналар, манзиллар ва вакциналар тайёрлаб қўйилган. Лекин 3–5 сентябрь кунлари кўнгиллилар скрининг қилинади ва улар зарур таҳлилларни топшириши лозим. Шу сабабли вакцина етказиб берилган бўлса ҳам, вакцинация қилиш ишлари 5 сентябрдан бошланиши мумкин», — деган Гинцбург.
Аввалроқ расмий рўйхатга олишдан олдинги тадқиқотлар сентябрь бошларида ўтказилиши, вакцина 3 сентябрдан етказиб берила бошлаши ҳақида хабар қилинганди.
26 августда Москва шаҳри мэри Сергей Собянин шаҳар аҳолисига мурожаат қилиб, Гамалея институтида ишлаб чиқилган «Спутник V» вакцинасини рўйхатга олишдан олдинги синовларида иштирок этишга чақирганди. Синовларда иштирок этмоқчи бўлганларга мэрнинг ва Москва маъмуриятининг порталларида сўров қолдириш талаб этилганди. Синовларда аввал COVID-19’га чалинмаган ёши 18 дан ошган 40 мингга яқин иштирокчи жамлаб олиниши кўзланган. Вакцина юборилишидан аввал ҳар бир кўнгилли скринингдан ўтади, яъни таҳлилларни топшириб, мутахассислардан консультация олади.
Тадқиқотлар поликлиникалар ва шаҳар касалхоналари бўлимларида ташкил қилинган махсус марказлар базасида ўтади. Тадқиқотларни молиялаштириш Москва шаҳри мэрияси ҳисобидан қопланади.
Иштирокчилар эмлашдан кейин ярим йил давомида тиббиёт ходимларининг телетиббиёт технологиялари ёрдамида амалга ошириладиган текширувлари остида бўлади. Шунингдек, кўнгиллилар ўз-ўзини кузатиш бўйича мобил илова шаклидаги дастурга ҳам ўзгаришлар ҳақида қайдлар ёзиб боради. Айрим иштирокчиларга электрон тасмалар берилиб, улар орқали қон босими ҳамда тана ҳарорати ўлчаб турилади.
Аввалроқ Россияда хавф гуруҳига кирувчи кишиларни коронавирусга қарши оммавий эмлаш 2020 йилнинг ноябрь—декабрь ойларида бошланиши ҳақида хабар берилганди.
Эслатиб ўтамиз, Россиянинг Гамалея институти томонидан яратилган коронавирусга қарши икки компонентли вакцина 11 август куни вақтинчалик рўйхатдан ўтиш гувоҳномасини олган. Вакцина тўлиқ самарадорлик тадқиқотини ўтказиш шарти билан рўйхатдан ўтказилган ва гувоҳнома 2021 йил 1 январга қадар амал қилади. Вакцина «Спутник V» деб номланган.
Вакцинани яратиш ва тадқиқ қилиш ишларини молиялаштирувчи Россиянинг тўғридан-тўғри инвестициялар жамғармаси раҳбари Кирилл Дмитриев Россияда коронавирусга қарши оммавий эмлаш 2020 йил октябрь ойидан бошланишини айтганди.
Шунингдек, «Роспотребнадзор»нинг «Вектор» давлат илмий маркази томонидан ишлаб чиқилган коронавирус инфекциясига қарши иккинчи вакцинанинг клиник синовлари иккинчи босқичи якунига етказилиши билан гувоҳномага эга бўлиши мумкинлиги хабар қилинди.
Изоҳ (0)