Россиянинг Астрахан шаҳрида Lada Largus ҳаракат вақтида ярмига қадар ер остига кириб кетди. Кўнгилсиз ҳодиса 31 август куни Савушкин ва Королёв кўчалари бурчагида содир бўлган, жароҳат олганлар йўқ, деб хабар беради Motor.
Машинанинг ер остига кириб кетгани тасвирланган видеолардан бири YouTube’даги «Россия 24» каналида пайдо бўлган. Кадрлардан кўриш мумкинки, автомобиль секин-аста эгилиб, кенг асфальт йўл остига кириб кетмоқда. Гувоҳларнинг сўзларига кўра, Largus тушиб кетган жой сувга тўла бўлган.
Астрахан ИИВБ маълумотларига кўра, автомобиль ичида авария вақтида уч киши бўлган. Улардан ҳеч бирига жароҳат етмаган, бироқ универсални чуқурликдан чиқариб олиш осон кечмаган — бунинг учун экскаватор чақиришга мажбур бўлишган.
Астрахан администрацияси раҳбари вазифасини бажарувчи Мария Пермякованинг сўзларига кўра, кўнгилсиз ҳодиса йўл остидан ўтган канализация қувурлари шикастлангани сабаб юзага келган: сувлар тупроқни ювиб кетган ва асфальт ўпирилиб тушган.
Вилоят губернатори Игор Бабушкин Лагрус ҳайдовчисидан узр сўраб, етказилган зарарни айбдорлар ҳисобидан қоплаб беришни ваъда қилган. Хавфли йўл вақтинча ёпилган, ҳайдовчиларга айланма йўллардан фойдаланиш тавсия қилинмоқда.
Изоҳ (0)