Тошкент вилоятида ОТМларга кириш имтиҳонлари ўтказиладиган ҳудудларда ёпиладиган кўчалар маълум қилинди

Ўзбекистон олий ўқув юртларига 2020/2021-ўқув йили учун кириш имтиҳонларида Тошкент вилоятидан жами 118 598 нафар абитуриент қатнашиши режалаштирилган. Абитуриентлар вилоятнинг турли шаҳар ва туманларидан Тошкент шаҳрига келишини инобатга олган ҳолда ҳамда абитуриентларга қулайлик яратиш мақсадида Тошкент вилоятининг барча туман-шаҳарлари марказларидан Тошкент шаҳар йўналишида қўшимча транспорт воситалари қатнови йўлга қўйилади. Бу ҳақда Тошкент вилояти Йўл ҳаракати хавфсизлиги бошқармаси хабар берди.

Бошқарма тест синовлари даврида ҳаракатланиш хавфсизлигини таъминлаш, йўл-транспорт ҳодисаларининг олдини олиш мақсадида тест синовлари олинадиган жойларда ота-оналар учун кутиш жойлари ташкил этилмаслигини яна бир марта эслатиб ўтди. Ота-оналардан фарзандларини уйда кутиш, ёпилган кўчалар атрофида тўпланиб, тирбандликлар юзага келишига сабабчи бўлмаслик сўралади.

Шунингдек, вилоятнинг Чирчиқ шаҳрида Ўзбекистон давлат жисмоний тарбия ва спорт университети ҳамда Чирчиқ давлат педагогика университетларида амалий имтиҳонлар олинади. Шу муносабат билан Ўзбекистон давлат жисмоний тарбия ва спорт университети жойлашган ҳудудга олиб борувчи Спортчилар кўчасида транспорт воситалари ҳаракати тўлиқ тўхтатилади.

Чирчиқ давлат педагогика университет жойлашган ҳудудга олиб борувчи Касаба уюшмалари ва Рудакий кўчаларида ҳам транспорт воситалари ҳаракати тўлиқ тўхтатилади.

Бошқарма ҳаракат иштирокчиларидан юзага келган вазиятни тўғри англашни ҳамда хизматга жалб этилган ички ишлар органлари ходимлари талабларини тўлиқ бажаришни, ноўрин хатти-ҳаракатлар содир этмасликни сўрамоқда.

Аввалроқ Давлат тест маркази бошқарма бошлиғи Диёрбек Қўчқоров ҳудудларда туман ҳокимликлари томонидан абитуриентлар учун транспорт ташкил қилиш чоралари кўрилаётганини маълум қилган. Эслатиб ўтамиз, бу йилги имтиҳонларда абитуриентлар 2 та фандан тест ечади, тест саволлари осонлаштирилади, абитуриентларга антисептик воситалар, қўлқоп, ниқоб, бош кийим бепул берилади, сиртқи таълимга ҳужжат топширган абитуриентлар учун ҳам имтиҳонлар 2 сентябрдан бошланади.