Навоий шаҳрида Амир Темур ва Ғалаба кўчалари кесишмасида қурилган пиёдалар учун ерусти мега-кўприги фойдаланишга топширилди. Бу ҳақда ИИВ ЙҲХББ ахборот хизмати хабар берди.
Маълум қилинишича, Ўзбекистон Мустақиллигининг 29 йиллиги арафасида фойдаланишга топширилган кўприк дақиқасига 400 га яқин пиёда ўтадиган светофорлар билан тартибга солинган чорраҳада жойлашган.
Мазкур иншоотнинг металл-конструкция ишлари «Навоий-жануб саноат монтаж» АЖ жамоаси томонидан олиб борилиб, унинг қад ростлашида 170 металл-конструкция ишлари амалга оширилган.
Кўприк баландлиги 5,5 метр, узунлиги 130 метрни, эни эса 4,5 метрни ташкил этади. Кўприкнинг тўрт томонидан лифт фаолияти йўлга қўйилган.
Кўприкнинг очилиш маросимида сўзга чиққан Навоий шаҳар ҳокими даставвал унинг қурилиши ғайриоддий дизайн ва ечимга эга эканлиги ҳақида фикр юритиб, қурилишда иштирок этган ҳамда жонбозлик кўрсатган қурувчиларни тақдирлаган.
Аввалроқ ушбу кўприк лойиҳаси қиймати 15 миллиард сўмдан ортиқни ташкил этиши тўғрисида хабар берилганди. Қайд этилишича, кўприк қурилиши 2019 йилнинг апрель ойида бошланган бўлиб, ўшанда унинг қиймати 12 миллиард сўм деб эълон қилинган, шунингдек, у 2019 йил сентябрида фойдаланишга топширилиши айтилганди.
Изоҳ (0)