Президент Шавкат Мирзиёев 29 август куни Тошкент метрополитенининг Юнусобод йўналиши орқали «Бодомзор» бекатидан янги «Туркистон» бекатигача поездда бориш вақтида Ўзбекистонда ўнлаб йиллар давомида метрога эътибор қаратилмаганини таъкидлади. Бу ҳақда «Ўзбекистон 24» телеканали томонидан тайёрланган лавҳада маълум қилинди.
«Тошкент кенгаймоқда, корхоналар сони ортяпти, чиқинди газлари экологияга тобора салбий таъсир кўрсатмоқда. Қанча кўп метро қурсак, одамларимиз соғлиғини шунча яхши сақлаймиз, уларнинг умрини узайтирамиз, ҳаётини енгиллаштириб, вақтни қисқартирамиз. 340 минг аҳолига эга Юнусобод тумани марказ билан боғлаб турувчи метрога жуда муҳтож эди», — дейди Президент.
«‘Прописка’ деган балони йўқ қилдик. Қорақалпоғистонда яшайдими, Сурхондарёда яшайдими, ҳамманинг пойтахтда яшашга ҳақи бор», — дея таъкидлайди Шавкат Мирзиёев.
Шаҳар кенгаймоқда, унга янги туманлар қўшиляпти. Коронавирус пандемияси экологияга эътибор қаратиш, тоза ҳавони сақлаб қолиш зарурлигини кўрсатиб берди, дея давом этади давлат раҳбари. Метро — энг экологик тоза, хавфсиз ва қулай жамоат транспорти ҳисобланади.
Президентнинг таъкидлашича, олдинлари метро қурувчилари ишлаш учун бошқа давлатларга кетган ва мутахассисларни Ўзбекистонга қайтариш ҳамда ушбу соҳани қайта тиклашга тўғри келган.
Шавкат Мирзиёевнинг маълум қилишича, Юнусобод метро йўналиши якунланмай қолгани сабаб метрополитеннинг бошқа йўналишлари зарарига ишлаган.
«Ўзи аслида катта лойиҳа бўлган, бироқ охирги 25-26 йилда бу лойиҳа эътибор қаратилмаган. Бунга турли сабаблар бўлган бўлиши мумкин: пул бўлмаган, шароит бўлмаган, лойиҳачи бўлмаган. Шу билан биз метрони секин-секин ёпишга ҳаракат қилдик: жетонларниям олиб қўйдик, талабаларни ҳам миндирмадик», — дейди Шавкат Мирзиёев.
«Эндиликда яна бир мақсадимиз бор: метрони Мирзо Улуғбек тумани марказидан ТТЗга қадар етказиш», — дейди Президент.
Эслатиб ўтамиз 29 августдан Тошкент ерусти ҳалқа метросининг биринчи босқичи ҳам ишга туширилган.
Изоҳ (0)