Айтишларича, наманганлик қоп тикувчилар Андижон ва Фарғонага қоп сотиш бўйича катта бизнес-режа бошлашибди. Нега деганда Андижонда қоп пул солиш учун керак бўлса, Фарғонада блогерларнинг бошига кийгизиш учун ишлатиларкан. Йўқолган сўхлик блогер воқеаси ҳам дайжестимиздан ўрин олган.
Баттол коронавирус умумий ҳолатда камроқ юқаётган бўлса-да, кўпгина жанубий вилоятларда авжига чиқяпти. Расмий хабарларга кўра, ҳозиргача коронавирусдан Ўзбекистонда 41 424 киши касалланган, 38 655 киши соғайган, 322 киши вафот этган. Даволанаётган беморлар сони икки ярим минг нафардан камайди. Даволаниш кўрсаткичи 93 фоизни ташкил этмоқда.
Нима учун мамлакатимизда коронавирусдан ўлим ҳолатлари жуда кам? Хорижлик шифокор буни мамлакат аҳолисининг ўртача ёши кичиклиги билан изоҳлади. Келинг, Ўзбекистонда нечта бола вирус юқтирганини кўриб чиқамиз. COVID-19 аниқланганлар орасида ёши бўйича таҳлил қилганимизда бир ёшгача болалар 190 нафарни (4,8%); уч ёшгача болалар 683 (17,4%) нафарни; уч ёшдан 7 ёшгача болалар 934 (23,8%) нафарни; 7-18 ёшгача болалар 2 125 (54%) нафарни ташкил қилмоқда. 3 932 нафар касалланганлар орасида жами соғайганлар — 3 293 нафарни (83,7%), бугунги кунда даволанаётганлар 639 нафарни (16,3%) ташкил этмоқда. Ҳозирги кунга қадар, расмий маълумотга кўра, болалар орасида касалликнинг ўта оғир кечиши кузатилмади, ўлим ҳолати бўлмади. Шу билан бирга, аввалроқ 14 ёшли бола коронавирус оқибатида вафот этгани ҳақида хабарлар тарқалганди.
Карантин қоидаларини айланиб ўтиб, тўй-маросимларни бир неча кун давомида ёки бир кунда 3-4 марта ўтказиш ҳолатлари учраб турибди. Ўлсак ҳам тўй қилиб ўлайлик, деймиз-да. Президент бу ҳафтадаги нутқида бунақа ҳолатларни чеклашни алоҳида таъкидлади.
* * *
Мустақиллик байрами муносабати билан 113 нафар маҳкум афв этилди. Уларнинг беш нафари асосий жазодан озод этилди, 53 нафари жазони ўташдан муддатидан илгари шартли озод қилинди, 15 нафарининг озодликдан маҳрум этиш жазоси енгилроқ жазо билан алмаштирилди. Шунингдек, 40 нафар шахсга тайинланган озодликдан маҳрум этиш жазосининг муддатлари қисқартирилди. Афв этилганлар орасида навоийшунос тадқиқотчи Акром Малик, Тошкентдаги «Хўжа Нуриддин» масжидининг собиқ имоми Руҳиддин Фахриддинов, санъацҳунос Искандар Худойберганов, Республика суд-тиббий экспертиза маркази собиқ ходими Рустам Абдуманнопов кабилар бор (уларнинг ҳаммаси 159-модда билан ҳукм этилган).
* * *
Президент фармони билан Бўстонлиқ туманида бошқарувнинг алоҳида тартиби жорий этилади. Туманда жойлашган давлат мулки объекти бўлган дам олиш уйлари, пансионатлар, санаторийлар ва бошқа объектлар, шунингдек, туристик инфратузилмани яратиш имконияти бўлган ер участкалари дирекцияга ўтказилади. Дирекция тумандаги ер участкалари ва давлат мулклари электрон аукцион орқали сотади. Бўстонлиқ тумани ҳокими тўғридан-тўғри ҳукуматга бўйсунади.
Азиз Абдуҳакимов «Чорвоқ» эркин туристик зонаси дирекцияси директори лавозимини эгаллайди. Бундан ташқари, Азиз Абдуҳакимов бош вазирнинг ўринбосари ва Туризмни ривожлантириш давлат қўмитаси раиси вазифасини бажаради. У, шунингдек, Бўстонлиқ туманини ҳам бошқаради. Азиз Абдуҳакимов юқорида саналган тўрт лавозимининг устига яна «Ипак йўли» халқаро туризм университети ректори ҳам саналади. Бир вақтнинг ўзида бир кадр бешта муҳим лавозимда ишлаши мамлакатимиз тарихида ноёб ҳодиса эканини таъкидламай илож йўқ. 2017 йилда Очилбой Раматов бир пайтда саккиз лавозимда ишлаганини эсга олиш мумкин.
* * *
1 сентябрь тобора яқин қолмоқда, болаларни мактабга юборамизми, йўқми? Халқ таълими вазирлиги буни ота-оналарнинг ўзига ҳавола қилганди. Сўровномада қатнашган 5,5 миллион ота-онанинг 76 фоизи анъанавий ўқиш тартибини, 24 фоизи эса масофавий ўқиш усулини танлабди. Шу хулосалардан келиб чиқиб, мактабларда таълим жараёнини бир вақтнинг ўзида икки хил шаклда ташкил этишга қарор қилинди. Яъни аксарият ота-оналар талабига кўра анъанавий, шу билан бирга масофавий шаклда йўлга қўйилади.
Янги ўқув йили 14 сентябрдан бошланади. Мактабда ўқиш 14 сентябрдан бошланишини Ўзбекистон Президенти Шавкат Мирзиёев ҳам 28 август, жума куни умумий ўрта таълим муассасаларида ўқув йилига тайёргарлик масалалари бўйича ўтказган видеоселектор йиғилишида айтиб ўтган эди.Ҳар бир мактабга ички ишлар ва Миллий гвардия ходимлари бириктирилиб, тартибни сақлаш ва карантин талабларига риоя этилишини назорат қилади. Ўқувчилар соғлигидан доимий хабардор бўлиш мақсадида ҳудудий поликлиника ёки врачлик пунктларидан камида бир нафардан тиббиёт ходими жалб этилади. Агар битта синфда бир вақтнинг ўзида уч нафар ўқувчида вирус аниқланса, фақат ўша синф карантинга олинади ва онлайн ўқишга ўтказилади. Дарс давомийлиги 45 дақиқалигича қолдирилади, ўқувчилардан форма талаб қилинмайди.
* * *
Шавкат Мирзиёев мустақилликнинг 29 йиллиги муносабати билан фан, таълим, адабиёт, маданият, санъат ва ОАВ ходимларини мукофотлади. Таниқли актриса Дилором Каримова ва хонанда Оғабек Собиров халқ артисти бўлди. Режиссёр Жаҳонгир Аҳмедов, ёзувчи Хуршид Дўстмуҳаммад, адабиёцҳунос Хондамир Қодирий хизмат кўрсатган маданият ходими унвонини олди. Футбол мураббийси Равшан Ҳайдаров хизмат кўрсатган спорт устози бўлса, футболчи Одил Аҳмедов хизмат кўрсатган спортчи фахрий унвонига лойиқ кўрилди.
Қалам аҳли ҳам мукофотсиз қолгани йўқ. Ёзувчи Эркин Аъзам «Фидокорона хизматлари учун» ордени, Усмон Азим «Эл-юрт ҳурмати» ордени, Қутлибека Раҳимбоева "Меҳнат шуҳрати" ордени билан мукофотланди. «Anhor.uz» веб-сайти бош муҳаррири Лобар Исломова, «Блогер Шаҳноза» саҳифаси бош муҳаррири Шаҳноза Соатова, «Daryo.uz» интернет-нашри бош муҳаррири ўринбосари Дилшод Шарипов «Шуҳрат» медали билан тақдирланди. Мукофотланганларнинг тўлиқ рўйхатини кўриш учун ушбу хабарни очинг.
* * *
Хўш, Фарғонада блогер бўлиш Нурбек Алимов ёзганидек, 1938 йилда Берлинда яҳудий, СССРда интеллигент бўлишдек, Арманистонда озарбайжон, Хитойда уйғур бўлишдек хатарлими? Фарғона вилояти Сўх туманидан бўлган видеоблогер Дадахон Ҳайдаров 10 суткага қамоққа олингани хабари тарқалди. Блогернинг отаси 22 августдан бери ўғли қаердалигини билмайди. Ўша куни уйига ИИВ ходимлари, участка нозири ва фуқаро кийимидаги кимса келган ва блогернинг фаолиятини текширишларини айтиб, енгил машинага солиб олиб кетган. Кейинроқ Дадахоннинг ўзи қўнғироқ қилиб, бошига қоп кийгизиб вертолётда Фарғонага олиб келишганини айтган.
22 ёшли Дадахон Ҳайдаров май ойида Сўхдаги тартибсизликлар чоғида бош вазир Абдулла Арипов олдига чиқиб, туманидаги муаммоларни ошкор гапириб бергани учун ҳибсга олингани тахмин қилинади.
Мавзуга доир:
* * *
Дайжестимизнинг охирги хабарини «Ҳафта қовуни ёки калта пайпоқ машмашаси» деб номладик. Бу гал маънавиятимиз посбонлари навбатдаги қовунини туширди.
«Ўзбекистон» телеканалининг «Муносабат» ток-шоусининг навбатдаги сонида эксперт сифатида иштирок этган Республика Маънавият ва маърифат маркази бўлим бошлиғи Мансур Мусаев калта пайпоқ кийганларни танқид қилди. Мансур Мусаев Европада калта пайпоқ ва ажралиб турувчи соч турмаги ноанъанавий жинсий ориентация вакилларининг рамзи эканини айтди. Бироқ бу қайси манбада келгани маълум эмас. @trolluz Мансур Мусаевнинг кийимини ҳам «гейлар» кийишини намойиш этувчи қисқа ҳажвий видеоролик тайёрлади.
Энг сўнгги янгиликларни «Дарё»да ўқинг. Карантин қоидаларига риоя қилинг. Ниқоб тақинг, бошингизга қоп ва оёғингизга калта пайпоқ кийманг.
Изоҳ (0)