Президент Шавкат Мирзиёев янги метро бекатларини кўздан кечириш ва поезддаги саёҳат давомида Ўзбекистон тараққиёт учун мактаблар фаолиятини тиклаб, фундаментал фанларни ривожлантириши лозимлигини таъкидлаган.
«Метро очилганидан кейин энди мактаблар фаолиятини қайта тиклаш лозим. Янги мактаблар қуриб, ўқитувчилар ва педагоглар обрўсини кўтариш керак. Йўллар, метро қуриляпти, энди мактаблардаги шароитларни ҳам яхшилаш зарур. Илм бўлмаса, олий маълумот бўлмаса, таълим берилмаса ва фундаментал билимлар ҳам бўлмайди… Бу ҳақда чуқур ўйлаш керак. Шунинг учун ҳам келаси йилни педагог ва мактаблар йили бўлиши лозимлиги ҳақида гапиргандим. Агар тиббиёт ва мактаблардаги вазият ўнгланса, ҳаммаси босқичма-босқич изига тушади. Лекин мактаб директори, ўқитувчи ва илмий фанларга етарлича эътибор берилмаяпти. Бу бизнинг асосий муаммомиз», — деган Шавкат Мирзиёев.
Президент фундаментал фанлар ривожи учун ишлатилган маблағ бир кун эмас бир кун натижа беришига ишонч билдирган.
«Биз учинчи Ренессанс учун пойдевор қўяяпмиз. Мактабларда зарур шароитлар яратилса, билим олишда ўзбек боласидек меҳнаткаш ва сабрлиси жаҳоннинг ҳеч ерида йўқ. Уйғониш даври барибир бўлади, ўшанда янги Улуғбеклар дунёга келади… Нима учун шунча маблағни математика, кимё, биологияга сарфлаяпмиз? Эртага ушбу фундаментал илмлар барибир натижа кўрсатади. Ахир бир вақтлар шундай бўлганди-ку», — дея Шавкат Мирзиёев сўзларини келтиради «Gazeta.uz».
Шунингдек, Шавкат Мирзиёев Ўзбекистонда геологиянинг ривожланиши сабаб бир йил ичида илк бора 20 та янги кон очиб, 70 тонна олтин қазиб олингани ҳақида ҳам гапирган.
«Ўзбекистонда аввал бир йил ичида 20 та янги кон топиб, 70 тонна олтин қазиб олинмаган. Геология йўқ эди. Мактабгача таълим, халқ таълими ва олий таълим ўртасида узвий алоқа бўлганида, ёшларни, халқни улар бунга муносиб эканига ишонтира олганимизда ортиқча ҳеч қандай ҳаракатга эҳтиёж қолмасди», — дея таъкидлаган давлат раҳбари.
Эслатиб ўтамиз, Шавкат Мирзиёев 2019 йил сентябрь ойида Тошкентда президент мактабининг очилиши муносабати билан ўқувчиларнинг ота-оналари, илм-фан арбоблари билан ўтказилган учрашув вақтида Ўзбекистонда учинчи Ренессанс даври бошланганини таъкидлаган эди.
Изоҳ (0)