LG минг доллар эвазига ноёб смартфон тақдим этишга тайёрланмоқда

Интернетда Жанубий Кореянинг LG Electronics компанияси томонидан яратилган қизиқарли смартфонга оид қўшимча маълумотлар пайдо бўлди. LG Wing шартли номини олган смартфон айланувчи экран остида қўшимча сенсор дисплейли ноодатий форм-факторга эга бўлади, деб хабар беради IXBT.

XDA-Developers ресурсининг маълумотларга кўра, LG Wing нархи 1600 долларни ташкил этади, HeraldCorp’нинг ёзишича эса, қурилма «минг доллар атрофида» бўлади.

Миш-мишларга кўра, смартфон асосий экранининг диагонали 6,8 дюймни, кичкинаси эса 4 дюймни ташкил этади. Шунингдек, қурилмага Snapdragon 765 ёки 765G процессори, асосий датчиги 64 мегапикселлга тенг камера ўрнатилиши кутилмоқда.

Таъкидлаш керакки, «ротатор» форм-фактори узоқ йиллар олдин машҳурликка эришган — бу каби телефонлар орқали QWERTY клавиатураларидан фойдаланиш мумкин бўларди. Албатта, у вақтларда иккита сенсор экрандан фойдаланилмаган, умуман олганда замонавий смартфон тушунчасининг ўзи ҳам бўлмаган.

Аввалроқ LG ўзини бактериялардан тозалаш функциясига эга симсиз наушникларни 149 доллардан сотувга чиқаргани тўғрисида хабар берилганди.