Бахтиёр Ашурматов: Ҳозир «Навбаҳор»нинг ҳолати яхши бўлмаслиги мумкин, бироқ ҳар бир жамоа шундай муаммога йўлиқди

«Қўқон-1912» бош мураббийи Бахтиёр Ашурматов Coca-Cola Суперлига 13-тури доирасида «Навбаҳор»га қарши кечган ўйиндаги ғалабадан (1:0) кейин ўз фикрлари билан ўртоқлашди.

«Навбаҳор» ўзим ишлаган собиқ жамоам ҳисобланади. «Навбаҳор» мухлислари хафа бўлмасин, бу ўйинда иккита бир-бирига муносиб жамоа тўп тепди. Тўғри, ҳозир «Навбаҳор» олтинга тенг очколарни йўқотди. Лекин ОКМК ва биз билан ўйинларда улар жанговар ўйин намойиш этди. Бу ўйин ҳақида гапирадиган бўлсам, «Навбаҳор» бунга қадар иккинчи рақам остида ҳаракат қилиб келаётган эди. Қарши ҳужумларни ўтказиб юбормаслик мақсадида биз ҳам учрашув бошидан очиқ футбол таклиф қилмадик. Рақибни иккинчи зонада кутиб олишга ҳаракат қилдик. Шоҳназар Норбеков ёрдамида ҳужумларни ташкил қилиш режамиз эди. Бу жуда ҳам принципиал аҳамиятга баҳс эди. Ғалаба билан барчани табриклайман. Александр Мерзляков, Қувондиқ Рўзиев ва бошқа футболчилар тайёр бўлмаса-да жанговар футбол намойиш этмоқда. Бундай йигитлар билан фахрланаман, уларнинг ҳар бири терма жамоада тўп тепишга муносиб.

Тўлиқ ўнг қанот янгиланиши олдиндан ўйланган режа эди. Эътибор берган бўлсангиз, аввалги ўйинларда ҳам иккита ўзгариш қилгандик. Мурод Холмуҳаммедов кўп учрашувларни ўтказиб юборди, шу сабабли қийналмаслиги учун ҳимояда ҳам ёрдам бера оладиган Сардор Азимовни ёнига чиқардик. Тўғри, Аваз Маматхўжаев, Муҳаммаданас Ҳасанов ёмон ўйин кўрсатмаяпти. Сардор Азимовда рақибни алдаб ўтиш, стандарт вазиятлар ишлаш хусусияти бор. Мурод Холмуҳаммедовни асосий таркибда туширмоқчи эдик. Биринчи бўлимда рақиб жамоа тўла куч билан ҳаракат қилган пайтда охиригача ўйнай олмаслигини билдик. Кейинги турларда у кучга тўлган ҳолатда жамоамизга ёрдам беради деб ўйлайман.

Гапни очиғи менга ҳам мураббий сифатида ўзимизни майдонда ўйнаган маъқулроқ эди. Лекин вазиятдан келиб чиқиб иш тутилди. Уйимизда жамоамиз яхши ўйин намойиш этади. Охирги пайтларда сафарда кўнгилдагидек тўп тепмаётган эдик. Ҳозир «Навбаҳор»нинг ҳолати яхши бўлмаслиги мумкин. Бироқ ҳар бир жамоа шундай муаммога йўлиқди. Кимдир касал бўлди, кимдир бошқа муаммолар билан курашди. Учрашувдан олдин Андрей Канчельскис ўйинни қолдириш борасида қўнғироқ қилди. Мен бунга розилик бергандим. Аммо бошида келишиб олинган эди. 4-5 нафар футболчи касалланса, ҳам ўйинлар давом этиши ҳақида келишгандик.

Мавсум бошида раҳбарлар билан гаплашганимизда жамоа сўнгги йилларда фақат лигада қолиш учун курашаётгани борасида фикр билдирилди. Жамоани жарликдан олиб чиқиб кетиш ва хотиржамликда чемпионатни ўтказган ҳолда юқори ўринларга курашиш вазифаси қўйилганди. Биринчи галда вазифамиз жамоани аутсайдерлар қаторидан олиб чиқиб кетиш ҳамда рақобатбардош жамоа тузиб босқичма-босқич шакллантириш эди. Вазифа ҳам ҳозирда жамғарган очколаримизга қараб ўзгариши мумкин.

Бахтиёр Ашурматов, «Қўқон-1912» бош мураббийи