Бундан роппа-роса 15 йил аввал, 2005 йилнинг 28 августида Фёдор Емеляненко ва Мирко (Крокоп) Филипович ўртасида MMA тарихидаги энг шов-шувли жанг бўлиб ўтганди.
Мирко ва Фёдор ўртасидаги жангдан аввал ақл бовар қилмас шов-шув кўтарилганди. Ўша куни Япониядаги «Сайтама Супер Арена» томошабинлар билан лиқ тўлганди. Жангни томоша қилиш учун 47 минг мухлис ташриф буюрган.
Фёдор жангни қўлидаги жиддий жароҳат билан ўтказишга мажбур бўлади. Жангдан тўрт ой аввал у япониялик Цуёши Косакуга қарши тўқнашувда қўлини синдириб олганди. Миркага қарши беллашувга қадар жароҳат тўлиқ тузалмайди, бироқ Фёдор жангни ортга суришни истамайди.
Россиялик яккакурашчи жанг аввалиданоқ рақибини ҳайрон қолдирганди. Хорватиялик жангчи ўз одатига кўра оёғи билан Фёдорнинг жигарига зарба беришга интилар, у эса мазкур зарбаларни оёғи билан блокларди. Тайёргарлик жараёнини Нидерландияда ўтказган Емеляненко янгича ҳимояланиш усулини ўйлаб топганди. Барча MMA жангчилари бош, тана ва оёқ учун алоҳида блок қўйишга интилган бир вақтда, Фёдор бир ҳаракатда танасининг ярмини ҳимоя қиларди.
Шунингдек, Фёдор рақибининг бошга йўналтирадиган «ҳайкик» зарбасига тайёр эди. Ҳар сафар бошга йўлланган оёқ зарбасидан кейин Фёдор рақибини, канатлар сари итариб юборар ёки «тейкдаун»га оларди.
Фёдор Мирконинг аввалги рақиблари қилган хатони такрорламади: у Крокопга оёқда бериладиган кучли зарбалар йўллаш имконини бермади ва тез-тез ҳужумга ўтиб турди.
Иккинчи раунд бошида Фёдор рақибининг бошига оёқ зарбаси йўллаб, кўпчиликни ҳайрон қолдиради. Крокоп асосий қуроли кураш бўлган рақибидан «ҳайкик» зарбасини сира кутмаганди. Ҳар бир раундда россиялик яккакурашчи ўзининг аниқ зарбалари ва фаоллиги билан ажралиб турарди. Сўнгги раундда Мирко партер ҳолатига ўтиб ҳимояланишга мажбур бўлади.
Бонг чалинганда баҳсда ким ютгани борасида ҳеч кимда шубҳа қолмайди. Емеляненко ҳакамлар қарорига кўра бир овоздан ғолиб деб топилади.
Шундан кейин Емеляненко яна беш йил давомида мағлубият нималигини билмади. 2010 йилга келиб россиялик яккакурашчининг ғалабали юришини Фабрисио Вердум тўхтатади.
Емеляненко MMA’да 46 та жанг ўтказиб, уларнинг 39 тасида ғалаба қозонади ва олти бор мағлубиятга учрайди. Яна битта жанги бекор қилинган.
Мирко Филипович эса MMA’да 52 та жанг ўтказган. Унда Крокоп 38 марта ғалаба қозонган (34 та муддатидан аввал), 11 бор мағлубиятга учраган ва икки жанг дуранг билан якунланган.
Изоҳ (0)