Роппа-роса 9 йил аввал «Манчестер Юнайтед» Арсен Венгернинг «Арсенал»ини «Олд Траффорд»га «кўмганди» (видео)

«Манчестер Юнайтед» 2011 йилнинг 28 августида ўз майдонида «Арсенал»ни 8:2 ҳисобида мағлубиятга учратганди.

Қуйида «Арсенал» учун энг омадсиз оқшомлардан бирини ёдга оламиз.

Ўйин кескин руҳда старт олади. 22-дақиқада Дэнни Уэлбек Андерсоннинг заргарона узатмасидан кейин ҳисобни очади. Орадан кўп ўтмай лондонликлар ҳисобни тенглаштириш учун қулай имкониятга эга бўлади, бироқ Робин ван Перси пенальтидан унумли фойдалана олмайди. Буни «қизил иблислар» Эшли Янгнинг шедевр голи билан жазолайди.

41-дақиқада Уэйн Руни жарима зарбасини қойилмақом ижро этиб, ҳисобни йирик кўринишга олиб келади. Биринчи бўлимга ҳакам томонидан қўшиб берилган вақтда Тео Уолкотт «Арсенал»нинг дастлабки голига муаллифлик қилади.

Иккинчи бўлим аввалида ҳам жамоалар бироз тин олади, 64-дақиқадан яна голлар ёмғири давом этади: Руни яна бир бор жарима зарбасидан унумли фойдаланади. 67-дақиқада эса Руни Нанининг голига ассистентлик қилади. Орадан уч дақиқа ўтиб Парк Жи Сун жарима майдони чизиғи ёнидан аниқ зарба йўллаб, жамоасининг олтинчи голини уради.

74-дақиқада ван Перси меҳмонларнинг иккинчи жавоб голини уради ва қисман хатоси ювади. Бироқ «канонирлар»нинг қувончи узоққа чўзилмайди, 77-дақиқада Карл Женкинсон иккинчи сариқ карточкасини олиб майдондан четлатилади.

Ўйин якунигача «Манчестер Юнайтед» футболчилари яна иккита гол уришга муваффақ бўлади. 82-дақиқада Уэйн Руни пенальтини аниқ амалга оширган бўлса, ўйин якунланиши арафасида Эшли Янг навбатдаги супер голи билан баҳсга чиройли нуқтани қўяди.

Бу кечада ҳаммаси эртакнамо бўлганди. Ҳимоячи Эшли Янгнинг жуда чиройли иккита голи ва уч бор голли узатма амалга оширганини айтмаса ҳам бўлади.

Бу Лондон клуби тарихидаги энг йирик мағлубият ҳисобланади. «Манчестер Юнайтед» мухлислар эса уни ҳали ҳам юзда табассум билан ёдга олади. Айниқса, яқинда қайд этилган худди шундай ҳисоб ўша супер тўқнашувни ёдга солиб юборганди.