«Реал Мадрид» дунёнинг энг кучли клубларидан бири сифатида ҳар доим энг яхши футболчилар билан шартнома имзолаб келган. Айтиш мумкинки, клубнинг энг омадли трансферларининг аксариятини Англия Премьер Лигасидан жалб этилган футболчилар ташкил этади.
Ўтган йиллар давомида «қироллик клуби» дунёнинг энг кучли беш лигасидан бири бўлган Премьер Лигадан кўплаб футболчиларни харид қилди, ҳозирча уларнинг энг сўнггилари Эден Азар ва Тибо Куртуа бўлиб турибди. Баъзи бир футболчилар якунда иссиқ жойини ташлаб, Мадридга келганига афсусланган бўлса, бошқалари том маънода «Реал» афсоналарига айланган. Қуйида «Реал»нинг АПЛ клубларидан амалга оширган энг омадли 5 та трансфери ҳақида ҳикоя қилинади.
Дэвид Бекҳэм
Дэвид Бекҳэм деярли «Барселона»га ўтишга арафасида эди, ҳатто «Юнайтед» ва каталон клуби шартнома борасида ҳам келишиб олганди, аммо Бекҳэм тўсатдан «Реал»га ўтишга қарор қилади ва Галактикоснинг бир қисмига айланади.
Бекҳэмнинг қўлга киритилгани Мадрид учун жуда муҳим аҳамият касб этарди, боиси клуб уни совринлар ютиш, голллар уриш учун эмас (албатта, булар шундоқ ҳам футболчи бажариши шарт бўлган ишлар), балки клуб брендини жаҳон бўйлаб тарқатиш ва ва мухлислар сонини кўпайтириш учун керак эди. Боиси Бекҳэмнинг машҳурлиги аллақачон футбол доирасидан ташқарига чиқиб бўлганди.
Бу Бекҳэм «Реал»да спорт борасида ҳеч нима қилмаган дегани эмас, албатта. Англиялик футболчи якунда «Реал» сафида иккита совринга эга чиқади.
Хаби Алонсо
Бир йўла уч клубнинг афсонаси бўлиш чакана иш эмас. Айнан Хаби Алонсо ўзининг «Реал Сосьедад», «Ливерпуль» ва «Реал»даги ўйинлари билан мана шундай мавқега эришган.
Ярим ҳимоя маэстроларининг аксарияти «Барселона»да ўйнаган бир пайтда, «Реал» Алонсога ҳар қачонгидан ҳам муҳтож эди. «Қаймоқранглилар» «Эль-Класико»да «Барса» билан рақобатлашиш учун ўрта чизиқни кучайтириши шарт ва зарур эди, Алонсо эса ушбу бўшлиқни аъло даражада тўлдириб берди.
«Ливерпуль»дан тахминан, 30 миллион фунт эвазига харид қилиниб, бошқа трансферлар орасида унчалик ҳам сезилмай қолган бўлса-да, Алонсо дарҳол асосий таркибнинг бир қисмига айланди. Жозе Моуриньо бошчилигида унинг Сами Хедира билан марказда кўрсатган ўйинлари Хави–Иньеста тандемидан асло қолишмасди.
У «Реал» сафида эришиш мумкин бўлган барча ютуқларни қўлга киритди. 2014 йилда эса Хаби Мадридни тарк этиб, «Бавария»га кўчиб ўтиб, ўша ерда фаолиятини якунлади.
Гарет Бэйл
Гарет Бэйл «Реал»даги мавқейига тузатиб бўлмас даражада зарар етказган бўлса ҳам (ўйинлари ва кетишни истамаслиги билан), уни АПЛдан амалга оширилган энг яхши трансферлардан бири эканлигини инкор этиб бўлмайди.
Ўша пайтда (2013 йил) рекорд даражадаги 100,8 миллион еврога «Тоттенҳэм»дан сотиб олинган Бэйл ўнг қанотда Криштиану Роналдунинг акси бўлиши кутилганди. Бунинг учун Бэйлда ҳамма нарса етарли эди: тезлик, дриблинг ва кучли зарба. Бироқ Бэйлнинг пешонасига «Реал» юлдузи бўлиш ёзилмаган экан. Бунинг устига унга сурункали жароҳатлар ҳам тинчлик бермади.
Шу тариқа у 2017/18 йилги мавсумда Зинедин Зиданнинг ишончини йўқотди, Хулен Лопетеги ва Сантьяго Солaри даврида ўзини кўрсата олмади. Зидан қайтганида эса Бэйлда ўз позициясини ўзгартириш имконияти деярли нолга тенг эди, афтидан, у бунга ҳаракат ҳам қилиб кўрмагандек.
Бэйл «Реал» билан Бэйл 4 марта Чемпионлар Лигасида, 4 бор клублар ўртасидаги Жаҳон чемпионатида, 2 бор Ла Лигада, 3 марта УЕФА Суперкубогида ва 1 мартадан Испания Кубоги хамда Испания Суперкубогида ғалаба қозонган. Бундан натижага исталган футболчи фақат ҳавас қилиши мумкин. Шундай эмасми? У юқорида қайд этилган кўплаб совринларни қўлга киритилишида муҳим рол ўйнаганини ҳам инкор этиш мушкул, шу сабабли ҳам Бэйл ушбу рўйхатда учинчи ўринга лойиқ кўрилган.
Лука Модрич
2012 йилнинг ёзида «Тоттенҳэм»дан яна бир трансфер амалга оширилди. 30 миллион евро эвазига Лука Модрич харид қилинди. Ўшандан кейин хорватиялик футболчи дунёнинг энг яхши марказий ярим ҳимоячиларидан бирига айланди.
Модрич Мадридга келганида кўпроқ ўйин амалиётига эга бўлиш учун курашди. Испан нашрлари эса уни мавсумнинг энг ёмон трансфер деб атади. Бироқ кутилмаганда Модрич аслида ҳаммаси бошқача эканини исботлаб, танқидчиларнинг овозини ўчириб қўйди.
Шундан сўнг ярим ҳимоячи фақат яхшиланди ва ҳақли равишда «қаймоқранглилар» афсонаси мақомини қўлга киритди. У клубда 17 та совринни қўлга киритган, жумладан тўрт мартадан УЕФА Чемпионлар Лигаси ва клублар ўртасидаги Жаҳон чемпионатида, икки марта Ла Лига, бир бор Испания Кубогида ғолиб чиққан.
Мундиалдаги (2018 йилги) чарчоқ туфайли юзага келган (2018/19 йилги мавсумда) пасайишдан сўнг Модрич яна юқори формасига қайтди, айниқса, карантиндан сўнг у барчага 34 ёшида ҳам анча-мунча нарсаларга қодир эканини исботлади.
Криштиану Роналду
Бошқа ким ҳам бўлиши мумкин?! 438 та учрашув 451 та гол, 4 та бор Чемпионлар Лигасида, 3 мартадан клублар ўртасидаги Жаҳон чемпионати ва УЕФА Суперкубогида, шунингдек, Ла Лига, Испания кубоги ва мамлакат Суперкубогида ҳам 2 мартадан бош совринга эга чиққан. Бундан ташқари, кўплаб шахсий ютуқлар шубҳасиз, уни клубнинг барча даврлардаги энг яхши ўйинчисига айлантирди.
2009 йилда «Реал» Роналду учун «Манчестер Юнайтед»га 94 миллион евро (ўша пайт учун рекорд даражадаги сумма) сарфлаганди, аммо Криш сарфланган маблағларнинг охирги тийинигача оқлаганига ҳеч кимда шубҳа бўлмаса керак. Криштиану Роналдунинг «Манчестер Юнайтед»дан «Реал»га ўтиши «қироллик клуби» учун нафақат АПЛ, балки клуб тарихидаги энг яхши трансфер ҳисобланади.
Ретро голлар:
Изоҳ (0)