Адлия вазирлигида давлат рўйхатидан ўтказилган Телекоммуникация хизматларини кўрсатиш қоидаларига кўра, мобил алоқа хизматларини кўрсатиш шартномаси асосида абонентга ажратилган абонент рақамини бошқа мобил алоқа оператори билан янги шартнома тузишда сақлаш ва ундан фойдаланиш мумкин, дейилади Адлия вазирлигининг «Ҳуқуқий ахборот» Telegram каналидаги маълумотда.
Мисол учун, UzMobile абоненти бўлган фуқаро телефон рақамини ўзгаришларсиз айнан шу кўринишда (коди билан бирга) Beeline абоненти сифатида расмийлаштириши мумкин бўлади. Бунинг учун мобил алоқа компанияси билан тегишли шартнома тузилади.
Ушбу ҳужжат 2020 йил 1 октябрдан кучга киради.
«Gazeta.uz» мамлакатдаги мобил алоқа компанияларидан биридаги мутахассис билан суҳбатлашган ва у мазкур хизматнинг операторлар техник жиҳатдан тайёр бўлганида ишга туширилишини маълум қилган.
Рақамни кўчириб ўтказиш хизматини жорий қилиш Ўзбекистонда 2018—2021 йилларда электрон тижоратни ривожлантириш дастурида белгилаб қўйилган. Шу йили декабрь ойида Ахборот технологиялари ва коммуникацияларини ривожлантириш вазирлиги абонент рақамини мобил алоқа тизимида кўчиришни («мобил қуллик»ни бекор қилиш) кўзда тутган ҳужжат лойиҳасини муҳокамага қўйган.
Unitel МЧЖ (Beeline) собиқ директори Дмитрий Шуков «мобил қулликни» бекор қилиш бироз кечикиб амалга оширилаётган ташаббус экани, чунки мобил телефон рақамларини кўчириш технологияси дунёда 15 йил аввал жорий қилинганини қайд этган.
Изоҳ (0)