Ўзбекистон Ташқи ишлар вазирлиги томонидан Ўзбекистон Транспорт вазирлиги билан биргаликда ишлаб чиқилган ва Республика махсус комиссиясига киритилган режага мувофиқ, Россиядаги ўзбекистонликларни олиб келиш учун 2020 йилнинг 28 августидан бошлаб «Ўзбекистон темир йўллари»нинг рейслари Екатеринбург, Ростов-Дон, Новосибирск ва Самара шаҳарларига ҳар ҳафтада ташкил этилади. Бу ҳақда Ташқи ишлар вазирлиги маълум қилди.
Вазирлик томонидан қайд этилишича, ҳозирда Россиядаги Ўзбекистон фуқароларининг айнан бир ҳудуд, жумладан, темир йўл станцияларида тўпланишни давом эттираётгани уларни босқичма-босқич олиб келиш жараёнига салбий таъсир кўрсатмоқда.
Таъкидланишича, коронавирус пандемияси шароитида фуқароларнинг оммавий тўпланиши вирусни юқтириш хавфини оширади. Айниқса, соғлиғи хавф остидаги тоифалар (қариялар, ҳомиладор аёллар, беморлар, сурункали касалликка чалинганлар) учун бу ҳолат янада хатарли.
Ташқи ишлар вазирлиги Россия ҳудудида бўлган фуқаролардан поезд станцияларида тўпланмасликни, ҳозирда бўлиб турган жойларида қолишни ва барча карантин талабларига қатъий риоя қилишларини яна бир бор сўраган.
Аввалроқ Россиянинг Шимолий Кавказ ва Жанубий федерал округларидан 927 нафар, Самара вилоятидан 918 нафар ўзбекистонлик поезд орқали мамлакатга олиб келингани ҳақида хабар берилганди.
Эслатиб ўтамиз, 9 августда Россиядан поездда олиб келинган 918 нафар ўзбекистонлик Намангандаги карантин зонасига жойлаштирилган. Шунингдек, шу куни бошқа бир поезд Самарадан Самарқандга ўзбекистонликларни олиб келган.
Изоҳ (0)