«Бу 10 йил аввал содир бўлганди». Россиялик блогер Илья Варламов чегара пунктидаги воқеа юзасидан Ўзбекистон Давлат божхона қўмитасига жавоб қайтарди

Россиялик блогер Илья Варламов 25 август куни ижтимоий тармоқларда эълон қилган видеоинтервьюсида Қозоғистондан Ўзбекистонга ўтиш чоғида божхоначиларнинг ножўя хатти-ҳаракатлари, сигаретларини олиб қўйганлиги ҳақида сўзлаб бергани хабар қилинган эди.

«Қозоқ-ўзбек чегарасидан ўтаётганимда содир бўлган қизиқ ҳолат ҳеч эсимдан чиқмайди. Қозоғистондан чиқиб, Ўзбекистон чегарасидан ўтаётганимда ўзбеклар юкхонани очиб, чамадонимни титкилай бошлади. Чегарачи кроссовкаларни олди ва сўради: «Ўлчами неча?» Мен айтдим: 43. У эса: «Афсус, 41-ўлчам йўқми?». Худди дўконда юргандек нарсаларни титкилади. Кейин у чамадонимиздаги сигаретларни топди ва уларни олиб қўйди. Яхшиям кроссовкам 41 ўлчамда эмасди деб ўйладим, бўлмаса кроссовкаларни олиб қўярди», — деганди блогер.

Ўзбекистон Давлат божхона қўмитаси бунга муносабат билдириб, Илья Варламов сўнгги 5 йилда Ўзбекистон—Қозоғистон чегарасидаги автомобиль ўтказиш пунктлари орқали умуман ҳаракатланмагани, фақатгина 2020 йил 9 февраль куни тонгги соат 05:10 да Россиядан тўғридан-тўғри Самарқанд аэропортига учиб келган ва 10 февраль куни мазкур вилоятдаги «Жартепа» чегара божхона пости орқали Тожикистонга чиқиб кетганини билдирган.

Варламов эса бунга жавобан чегарадаги воқеа 10 йил олдин содир бўлганини айтди.

«Ҳурматли Божхона қўмитаси, сизларда ҳаммаси яхшими? Умид қиламанки, эндиликда сафингизда 41 ўлчамдаги оёқ кийим киядиган фирибгарлар ишламаяпти. Бу 10 йил олдин бўлган ва аминманки, бу вақт ичида сизлар яхши томонга ўзгардингиз. Аммо мукаммалликнинг чегараси йўқ. Божхона қўмитаси фаолиятини яна бироз яхшилаб, Россия фуқароларининг шахсий маълумотлари ва сафари тафсилотларини ошкор этишни тўхтатишни таклиф қиламан», — деб ёзган у.

Маълумот учун, Варламов ўз блогида 2010 йилнинг апрелида «Йўл қайдлари. Учинчи кун, биз қандай қилиб Ўзбекистонга етиб олдик?» сарлавҳаси остида пост эълон қилган. Блогер унда Қозоғистондан Ўзбекистонга чегарадан қандай қилиб ўтгани, Ўзбекистон чегара постлари 8 соатгина ишлаши, чегарадан ўтаётганда барча техникалар ва пулларни декларацияга киритиш лозимлиги ҳақида ёзган. Шунингдек, у ўзбекистонлик чегарачилар фотоаппаратининг флеш-хотирасидаги суратларни текширганини ҳам қайд этиб ўтган.