Коронавирусга чалинган ота-она фарзандини касалликдан қандай асраши керак? Мутахассис жавоби

АОКА залида ташкил этилган брифингда Коронавирусга қарши курашиш штаби аъзоси, тиббиёт фанлари доктори, профессор Ҳабибулло Оқилов ёш болали, ўзини яккала олмайдиган коронавирусга чалинган беморларга тавсия бериб ўтди.

Мутахассис яқин алоқада бўлганда вирус юқишининг олдини олиш имконсизлигини билдирди. Бундай вазиятда ўзини яккала олмайдиган ота-оналар болалари ҳам юқтиришини англаши лозим. Ҳатто доимий ҳимоя чоралари: қўлларни совунлаб ювиш, ниқоб тақиш, антисептиклардан фойдаланиш, тузли эритмалар ҳам бир ҳудуддаги одамларнинг бир-бирига юқтирмаслигини таъминлай олмаслиги айтилди.

Бироқ айтиш керак, болалар COVID-19’ни аломатсиз ёки енгил шаклда ўтказишади. Уларда тумов, тана ҳароратининг бироз ошиши, томоқда қичишиш, ич кетиши каби белгилар кузатилиши мумкин. Бироқ кўп ҳолатларда болалар ўзини яхши ҳис қилади ва катталардаги сингари кучли ҳолдан тойиш, ҳолсизлик ёки иштаҳа йўқолиши кузатилмайди. Аломатлар ривожланса, симптоматик даволаш керак бўлади: болаларга тез-тез суюқлик бериш, бурунни тузли эритмалар билан чайиш, тана ҳарорати ошиб 38,5 даражадан ортса, болалар учун мўлжалланган ‘Парацетамол’ бериш керак.

Ҳабибулла Оқилов, Коронавирусга қарши курашиш штаби аъзоси 

Эслатиб ўтамиз, Жаҳон соғлиқни сақлаш ташкилоти 10 ёшгача бўлган болаларда коронавирусга чалиниш эҳтимоли камлигини маълум қилган, АҚШдаги Вандербилт университети Тиббиёт маркази тадқиқотчилари нима сабабдан болалар коронавирусга камроқ чалинаётгани ва касалликни осон ўтказаётганини аниқлаган.