Bundan roppa-rosa 15 yil avval, 2005-yilning 28-avgustida Fyodor Yemelyanenko va Mirko (Krokop) Filipovich o‘rtasida MMA tarixidagi eng shov-shuvli jang bo‘lib o‘tgandi.
Mirko va Fyodor o‘rtasidagi jangdan avval aqlbovar qilmas shov-shuv ko‘tarilgandi. O‘sha kuni Yaponiyadagi “Saytama Super Arena” tomoshabinlar bilan liq to‘lgandi. Jangni tomosha qilish uchun 47 ming muxlis tashrif buyurgan.
Fyodor jangni qo‘lidagi jiddiy jarohat bilan o‘tkazishga majbur bo‘ladi. Jangdan to‘rt oy avval u yaponiyalik Tsuyoshi Kosakuga qarshi to‘qnashuvda qo‘lini sindirib olgandi. Mirkaga qarshi bellashuvga qadar jarohat to‘liq tuzalmaydi, biroq Fyodor jangni ortga surishni istamaydi.
Rossiyalik yakkakurashchi jang avvalidanoq raqibini hayron qoldirgandi. Xorvatiyalik jangchi o‘z odatiga ko‘ra oyog‘i bilan Fyodorning jigariga zarba berishga intilar, u esa mazkur zarbalarni oyog‘i bilan bloklardi. Tayyorgarlik jarayonini Niderlandiyada o‘tkazgan Yemelyanenko yangicha himoyalanish usulini o‘ylab topgandi. Barcha MMA jangchilari bosh, tana va oyoq uchun alohida blok qo‘yishga intilgan bir vaqtda, Fyodor bir harakatda tanasining yarmini himoya qilardi.
Shuningdek, Fyodor raqibining boshga yo‘naltiradigan “haykik” zarbasiga tayyor edi. Har safar boshga yo‘llangan oyoq zarbasidan keyin Fyodor raqibini, kanatlar sari itarib yuborar yoki “teykdaun”ga olardi.
Fyodor Mirkoning avvalgi raqiblari qilgan xatoni takrorlamadi: u Krokopga oyoqda beriladigan kuchli zarbalar yo‘llash imkonini bermadi va tez-tez hujumga o‘tib turdi.
Ikkinchi raund boshida Fyodor raqibining boshiga oyoq zarbasi yo‘llab, ko‘pchilikni hayron qoldiradi. Krokop asosiy quroli kurash bo‘lgan raqibidan “haykik” zarbasini sira kutmagandi. Har bir raundda rossiyalik yakkakurashchi o‘zining aniq zarbalari va faolligi bilan ajralib turardi. So‘nggi raundda Mirko parter holatiga o‘tib himoyalanishga majbur bo‘ladi.
Bong chalinganda bahsda kim yutgani borasida hech kimda shubha qolmaydi. Yemelyanenko hakamlar qaroriga ko‘ra bir ovozdan g‘olib deb topiladi.
Shundan keyin Yemelyanenko yana besh yil davomida mag‘lubiyat nimaligini bilmadi. 2010-yilga kelib rossiyalik yakkakurashchining g‘alabali yurishini Fabrisio Verdum to‘xtatadi.
Yemelyanenko MMA’da 46 ta jang o‘tkazib, ularning 39 tasida g‘alaba qozonadi va olti bor mag‘lubiyatga uchraydi. Yana bitta jangi bekor qilingan.
Mirko Filipovich esa MMA’da 52 ta jang o‘tkazgan. Unda Krokop 38 marta g‘alaba qozongan (34 ta muddatidan avval), 11 bor mag‘lubiyatga uchragan va ikki jang durang bilan yakunlangan.
Izoh (0)