Марғилонда Cobalt ва Spark иштирокидаги ЙТҲда 22 ёшли икки йигит ҳалок бўлди
Фарғонанинг Марғилон шаҳрида Cobalt ва Spark иштирокидаги мудҳиш ЙТҲда 22 ёшли икки йигит вафот этди. Бу ҳақда ЙҲХББ матбуот хизмати хабар берди.
Воқеа 26 август куни соат соат 01:00 ларда Марғилон шаҳридаги Хиёбон кўчасидан ўтган кўприк устида содир бўлган.
22 ёшли ҳайдовчи А.Р. Cobalt тезлигини меъёридан оширган ҳолда ҳайдаб кетаётиб, йўлнинг хавфли бурилиш жойида бошқарувни йўқотган ва ажратиб турувчи бордюр устидан ҳаракатланиб ўтиб, қаршисидан келаётган 34 ёшли ҳайдовчи Ш.А. бошқарувидаги Spark билан тўқнашган.
Оқибатда Cobalt ҳайдовчиси А.Р. воқеа жойида, унинг 22 ёшли йўловчиси М.Ғ. шифохонада вафот этган. Spark ҳайдовчиси Ш.А., йўловчилари 46 ёшли Х.М. ва 30 ёшли А.О. тан жароҳати олиб шифохонага ётқизилган.
Ушбу ЙТҲ юзасидан 26 август куни Марғилон шаҳар ИИБ ҳузуридаги ТБ томонидан Жиноят кодексининг 266-моддаси 3-қисми «а» банди (одамлар ўлимига олиб келган транспорт воситалари ҳаракати ёки улардан фойдаланиш хавфсизлиги қоидаларини бузиш) билан жиноят иши қўзғатилган. Ҳозирда тергов ҳаракатлари олиб борилмоқда.
Аввалроқ Навоийда Nexia ҳайдовчиси ухлаб қолиши оқибатида даҳшатли ЙТҲ содир бўлгани, Сирдарёда Coca-Cola олиб кетаётган юк машинаси ағдарилиб кетгани, Қамчиқ довонида Isuzu юк машинасининг ёниб кетиши оқибатида икки киши, Жиззахда автобуснинг юк машинасига урилиши натижасида 2 киши ҳалок бўлгани хабар берилган эди.
