Ўзбекистон Олий Мажлиси Қонунчилик палатаси ялпи мажлисида молия вазири Тимур Ишметов давлат бюджетининг 2020 йил 6 ойлик ижроси юзасидан ҳисобот берди. Унда Ўзбекистоннинг ташқи ва ички қарзлари ҳақида ҳам маълумот берилди, деб хабар бермоқда ЎзА.
Ҳисоботда келтирилишича, 2020 йилнинг 1 июль ҳолатига кўра, Ўзбекистон ҳукумати номидан ва унинг кафолати остида жалб қилинган қарз маблағлари қолдиғи 19,6 миллиард доллар эквивалентини ташкил этган. Хусусан, давлат ташқи қарзи 17,3 миллиард долларга етган. Давлат ички қарзи эса 2020 йил 1 январь ҳолатига нисбатан 0,3 миллиард долларга ошиб, 2,3 миллиард долларни ташкил этган.
Давлат бюджетини қўллаб-қувватлаш ҳамда Инқирозга қарши курашиш жамғармасини молиялаштириш учун 2020 йилнинг ўтган 6 ойида 1 миллион доллардан ортиқ маблағлар жалб қилинди. Жаҳон банки томонидан Ислоҳотларни қўллаб-қувватлаш лойиҳаси (2-транш) юзасидан қўшимча молиялаштириш сифатида 200 миллион доллар миқдоридаги имтиёзли кредит 30 йил муддатга ажратилди.
Мазкур кредитнинг фоиз тўловлари йилда икки марта (15 июнь ва 15 декабрь) амалга оширилиб, 2020 йилда 2,1 миллион долларни ташкил этиши кутилмоқда. Асосий қарз тўловлари имтиёзли давр тугагандан кейин 2025 йилдан кредитнинг асосий қисмини сўндириш бошланади ҳамда ҳар йили 8 миллион долларни ташкил этади.
Халқаро валюта жамғармаси томонидан республика иқтисодиётига коронавирус пандемиясининг салбий таъсирини камайтириш мақсадида 375 миллион доллар эквивалентида кредит маблағлари ажратилди. Имтиёзли кредитлар ўз ичига 10 йил муддатга (шундан, 5 йил имтиёзли давр) 125 миллион доллар эквивалентига тенг фоизсиз тезкор кредитлаш линияси ва 5 йил муддатга (шундан 3 йил имтиёзли давр) 250 миллион доллар эквиваленти 1,05 фоиз ўзгарувчан ставкадаги тезкор молиялаштириш инструментини олади. 10 йиллик кредит бўйича фоиз тўловлари амалга оширилмайди. Асосий қарз тўловлари йилда икки марта имтиёзли давр тугагандан кейин, 2025 йилдан сўндириш бошланади ҳамда йиллик 18,4 миллион СДР ёки 25,6 миллион долларни ташкил этади.
Осиё тараққиёт банки томонидан 500 миллион доллар миқдоридаги бюджетни қўллаб-қувватлаш учун имтиёзли кредит 15 йилга (шундан, 3 йил имтиёзли) ўзгарувчан ставкада ажратилди. Бугунги кунда жами ўртача йиллик фоиз ставкаси -0,9 фоизни ташкил этмоқда. Ушбу кредитнинг фоиз тўловлари йилда икки марта (15 апрель ва 15 октябрь) амалга оширилиб, 2020 йилда 1,2 миллион долларни (2020 йилда тўлов бир марта бўлиши ҳисобига) ташкил этиши кутилмоқда. Асосий қарз тўловлари имтиёзли давр тугагандан кейин, 2023 йилдан бошланади ҳамда ҳар йили 41,7 миллион долларни ташкил этади.
Эслатиб ўтамиз, давлат ташқи қарзи 2020 йил 1 январь ҳолати бўйича 15,6 миллиард долларни ташкил қилганди. Ўзбекистон ҳукумати номидан ва унинг кафолати остида жалб қилинган қарз қолдиғи 2020 йил 1 апрель ҳолатига кўра, 18,2 миллиард доллар ёки ялпи ички маҳсулот (ЯИМ)га нисбатан 31,3 фоизни ташкил этган.
Аввалроқ Ўзбекистон пандемия вақтида Жаҳон банки, Осиё тараққиёт банки ва Халқаро валюта жамғармасидан коронавирусга қарши курашиш учун 1 миллиард доллардан ортиқ кредит олган.
Изоҳ (0)