Ўзбекистонда коронавирусга чалинган беморларни даволашда жалб қилинган 72 мингдан ортиқ ходимга 241,3 млрд сўм қўшимча рағбатлантириш тўланди

Молия вазири Тимур Ишметов Давлат бюджетининг 2020 йилнинг 1-ярим йиллигидаги ижроси юзасидан Олий Мажлис Қонунчилик палатаси ялпи мажлисидаги маърузасида коронавирус инфекциясига қарши курашиш тадбирларига Инқирозга қарши жамғармадан ажратилган маблағлар юзасидан маълумот берди. Бу ҳақда вазирлик хабар бермоқда.

«Ушбу соҳада амалга оширилган харажатларнинг 724 миллиард сўми Инқирозга қарши курашиш жамғармаси ҳиссасига тўғри келди.

Шундан коронавирус тарқалишининг олдини олишга қаратилган тадбирларга жалб этилган тиббиёт, санитария-эпидемиологик ва бошқа ходимларнинг 72 001 нафарига 241,3 миллиард сўм қўшимча рағбатлантириш тўловлари тўланди.

Ушбу тўловлардан:

• ойлик лавозим маошига 6 фоиз миқдорида ҳар кунлик қўшимча тўловлар учун жами 56 985 нафар ходимга 85,2 миллиард сўм, шундан 14 873 нафар врачга 33,1 миллиард сўм;
• 14 кунлик фаолият даври учун махсус қўшимча рағбатлантириш тўловлари бўйича жами 6477 нафар ходимга 142,5 миллиард сўм, шундан 1 960 нафар врачга (ҳар бирига 25 миллион сўмдан) — 70,0 миллиард сўм;
• беморлар билан ишлаган вақтида коронавирус инфекцияси юқтириб олган 2 нафар тиббиёт ходимига бир марталик тўлов бўйича 283 миллион сўм тўлаб берилди.

• уч маҳал иссиқ-овқат учун 73,0 миллиард сўм;
• дори-дармон ва зарарсизлантирувчи воситалар учун 44,7 миллиард сўм;
• тиббий асбоб-ускуналар сотиб олиш учун 79,0 миллиард сўм;
• тест тизимлар, чойшаблар ва бир марталик ҳимояловчи кийимлар ва бошқа зарур анжомлар учун 131,1 миллиард сўм;
• транспорт воситаларини сотиб олиш учун 12,2 миллиард сўм;
• жойларни дезинфекция қилиш ва бошқа тадбирлар учун 17,5 миллиард сўм сафарбар этилди», — дейди Ишметов ўз маърузасида.