Социология фанлари доктори Улуғбек Азизов Ўзбекистон давлат жаҳон тиллари университетига ректор этиб тайинланди. Бу ҳақда университет матбуот хизмати «Дарё»га маълум қилди.
Янги ректорни университет жамоасига таништириш маросимида Ўзбекистон Президентининг фан, таълим, соғлиқни сақлаш ва спорт масалалари бўйича маслаҳатчиси Абдужаббор Абдувоҳидов ҳамда Олий ва ўрта махсус таълим вазирининг фан ва инновациялар бўйича ўринбосари Узоқбой Бегимқулов иштирок этган.
Улуғбек Азизов 2016 йилдан ҳозирга қадар айнан шу университет ҳузуридаги Чет тилларини ўқитишнинг инновациявий методикаларини ривожлантириш Республика илмий-амалий маркази директори-проректор лавозимида фаолият юритиб келган. У 2000 йилда Ўзбекистон давлат жаҳон тиллари университети бакалавриат босқичини тамомлаган. 2009 йилда Япониянинг Сукуба университети магистратурасида таҳсил олган. 2015 йилда Германияниянинг Эрфурт университетида фалсафа доктори (PhD) иши ёқлаган.
Эслатиб ўтамиз, шу йилнинг апрель ойида ЎзДЖТУнинг собиқ ректори Ғанишер Раҳимов ҳукумат қарори билан Самарқанд давлат университетининг Денов тадбиркорлик ва педагогика институти ректори этиб тайинланган эди. Шундан сўнг ҳозирги кунгача ректорнинг ўқув ишлари бўйича проректори Баҳром Қулматов вақтинчалик ректор вазифасини бажарувчи сифатида ишлаган.
Изоҳ (0)