Хитой COVID-19’га қарши курашаётган ўзбекистонлик шифокорларни ҳимоя қилиш учун халқ табобати усулида тайёрланган дориларни етказиб беради

Хитойнинг Beizhong Yilin Pharm Tech (Beijing) Co. Ltd. фармацевтика компанияси Ўзбекистонда коронавирусга чалинган шифокорларни касалликдан ҳимоя қилиш учун хитой халқ табобати усулида тайёрланган дориларни етказиб беради. Бу ҳақда компания раҳбари Ўзбекистон соғлиқни сақлаш вазири Алишер Шодмонов билан учрашувда маълум қилди.

Соғлиқни сақлаш вазирлиги томонидан хабар берилишича, Хитойнинг Beizhong Yilin Pharm Tech (Beijing) Co. Ltd. фармацевтика компанияси ҳамда Цзянси анъанавий хитой табобати университетининг 10 нафар шифокор ва мутахассисисидан иборат гуруҳ Ўзбекистонда бўлиб турибди.

Хитойлик мутахассисларнинг фикрига кўра, анъанавий хитой табобати Ғарб тиббиёти билан биргаликда COVID-19’нинг олдини олиш, уни даволаш ва реабилитациясида муҳим аҳамият касб этади. «Буни мамлакатнинг бир қатор провинцияларида, биринчи навбатда, янги коронавирус тарқалишининг марказига айланган Хубэйда ўтказилган клиник кузатишлар ҳам тасдиқламоқда», — дейилади вазирлик хабарида.

Вазирлик хабарига кўра, Хубэй провинциясида коронавирусга чалинган беморларнинг 91,6 фоизи, мамлакат бўйлаб 92,4 фоизи соғайишида айнан анъанавий хитой табобати ҳам алоҳида аҳамият касб этган.

«Энг қизиғи, коронавирусга қарши курашиш учун Ухань шаҳрига 42 минг нафар хитой халқ табобати вакили сафарбар қилинган бўлса, уларнинг бирортаси ҳам инфекцияни юқтириб олмади. Бунинг сабаби, биринчидан, ҳимоя воситаларидан тўғри фойдаланишда бўлса, иккинчидан, халқ табобати усулида тайёрланган дори воситаларини қабул қилганлигидадир. Ўзбекистонда COVID-19 билан олдинги сафларда курашаётган тиббиёт ходимлари учун ҳам ушбу дори воситаларини етказиб берамиз», — дея таъкидлаган компания президенти Сюэжун Линь.

Қайд этилишича, Сюэжун Линь соғлиқни сақлаш вазири Алишер Шодмонов билан мулоқот давомида 4 йўналишда анъанавий хитой табобати усулида тайёрланган дори воситаларини қўллаган ҳолда коронавирус инфекцияси билан курашишни таклиф қилди:

• касаллик профилактикасида;
• коронавирусни енгил шаклда бошдан ўтказаётган беморларни даволашда;
• енгил шаклдаги беморларнинг ҳолати оғир ва ўрта оғирга ўтиб кетмаслиги учун парвариш қилишда;
• COVID-19’дан соғайганларни реабилитация қилишда.