Қор ёғса, ташқи дунёдан узилиб қоладиган Шаҳрисабзнинг Кўл қишлоғи учун қишгача йўлтанламас тез ёрдам машинаси олиб келинадиган бўлди

Қашқадарё ҳокими Зоир Мирзаев вилоятнинг собиқ ҳокими Зафар Рўзиев даврида кўтарилган, аммо ечимини топмаган муаммога ечим топди. Бу ҳақда «Дарё»га вилоят ҳокимлиги ахборот хизмати раҳбари Аҳрор Содиқов маълум қилди.

Хабар берилишича, вилоят раҳбари 23 август, якшанба куни Ҳисор тоғ тизмалари этагида жойлашган чегара қишлоқ — Шаҳрисабзнинг Кўл қишлоғида бўлган.

«Вилоят сектор раҳбарлари, вилоят ДХХ, Миллий гвардия, Фавқулотда вазиятлар бошқармаси, Божхона бошқармаси, Жиноят ишлари бўйича вилоят суди, Халқ қабулхонаси раҳбарлари ушбу чегара қишлоқ аҳолиси билан учрашиб, уларни қийнаб келаётган асосий муаммолар билан қизиқди», — дейди Аҳрор Содиқов.

Таъкидланишича, Зоир Мирзаев Кўл қишлоғида яшовчи аҳолининг асосий муаммосидан хабардор эканлигини айтган.

«Энг асосий муаммо — қиш ойларида шаҳар марказига етказадиган йўл ва тиббий хизмат кўрсатиш эканини олдиндан ОАВларда ҳам ўқиб, тегишли режаларни тузиб олганман. Кўл ва Китоб туманидаги Шут қишлоқлари учун йўлтанламас тез ёрдам машиналари олиб келмоқдамиз», — деган вилоят ҳокими кўлликлар билан мулоқотда.

Эслатиб ўтамиз, 2019 йил 31 январь куни «Дарё»да Шаҳрисабз туманининг Кўл қишлоғида икки метр қор ёғгани, натижада аҳоли 10 кунга «дунёдан узилиб қолгани» ҳақида ҳикоя қилинганди. Вилоятнинг ўша пайтдаги раҳбари Зафар Рўзиев мазкур муаммолар ечимини топишини айтса-да, амалий натижа бўлмаганди.

«Дарё» мухбирининг 2019 йилнинг ёз ойида Кўл қишлоғига қилган иккинчи сафарида муаммо ҳақида яна сўз очган аҳоли 2019 йилнинг қиш мавсумини ҳам қийинчиликлар билан ўтказишга маҳкум эканлигини, қишлоққа ажратилган техника қўшни қишлоққа бериб юборилганини айтганди.

Вилоят ҳокимлиги ахборот хизматининг қўшимча қилишича, ДХХ раиси Абдусалом Азизов ҳам яқинда ушбу қишлоқда бўлиб, аҳолининг бир нечта муаммосини ҳал этган.

«Маҳаллада қурилиши бошланган халқ кутубхонаси ҳам қиш мавсумига қадар якунига етказилади. Кутубхонага аҳоли талабидан келиб чиқиб, ҳокимлик ҳисобидан қўшимча 10 миллион сўмлик тожик тилидаги бадиий китоблар тўплами олиб келинади», — дейди Аҳрор Содиқов.

Кўл қишлоғида шу пайтга қадар картошка экилган майдон 60 гектарни ташкил этган бўлса, эндиликда картошка экиладиган майдонни 3 минг гектаргача кенгайтиришга келишиб олинган.

«Шундан сўнг қишлоқдан 18 километр узоқликда жойлашган Ҳазрати Султон зиёратгоҳига ҳам борилиб, Яратгандан халқимиз ва дунё халқларини коронавирус балосидан асраш, ҳар бир соҳа ривожи ҳамда халқимиз розилиги йўлида одилона сиёсат олиб бораётган юртбошимизга куч-қувват, сиҳат-саломатлик сўралди», — дейилади ҳокимлик ахборот хизмати тарқатган хабарда.