Европалик олимлар ўпкадаги фиброз тўқимага айланган алвеолаларнинг фоизидан келиб чиқиб, инсонларга ногиронлик берилиши кераклиги ҳақида ўз таклифларини бермоқда. Бу ҳақда Коронавирусга қарши кураш штаби аъзоси, профессор Севара Убайдуллаева «Шифобахш» Telegram каналига маълум қилди.
Мутахассиснинг таъкидлашича, беморнинг асл ҳолатига баҳо бериш учун коронавирусдан кейин ўпканинг алвеолаларини фиброз тўқималари қанчалик қоплаганини билиш муҳим.
«Сабаби фиброз тўқима қоплаган алвеолалар қайта тикланмайди, оддий пайга айланиб қолади. Оқибатда инсоннинг бутун умрга ногирон бўлиб қолишгача олиб келиши мумкин. Лекин бунинг аниқ даражаси белгилангани йўқ. Бу ҳозирча дунё олимлари томонидан берилаётган таклиф», — деди мутахассис.
Унинг қўшимча қилишича, ўпканинг 25-30 фоиз қисмигача жароҳатланиши фиброзни билдирмайди.
«Фақат оғир ва ўта оғир кечувидан қайта тикланган ўпкалар бор. Ана ўшаларда тўқималар шунчалик ёмон ҳолатга келади ва бу фиброзга айланиб кетади. Мана шу турдаги касалликларда ногиронлик бўлиши мумкин. Ҳозирда ўпканинг 60-70 фоизидан ортиғи жароҳатланганларда аъзонинг маълум бир қисми фиброзга айланиши юқори», — деди профессор Убайдуллаева.
Аввалроқ Санитария-эпидемиология назорати давлат инспекцияси бош инспектори Нурмат Отабеков коронавирус асоратлари ҳақида маълумот берган. Унга кўра, инфекциянинг оғир шакли билан касалланган беморларда тромбоэмболия, тромбоз, ўпка артерияси тромбоэмболияси ёки ўткир коронар етишмовчилик каби ўзгаришлар натижасида баъзи беморларда ўпка ҳаётий сиғимининг 20-30 фоизга камайиши, алвеолалар деворларида бириктирувчи тўқиманинг юзага келиши туфайли касалликдан сўнг ўпка фибрози кузатилиши мумкинлиги, бу эса ҳансираш, сурункали кислород етишмовчилигига олиб келишини айтган. Бундан ташқари юрак-қон томир тизимида, буйракларда ва асаб тизимида ҳам патологик ўзгаришлар юзага келиши мумкин.
Изоҳ (0)