Uzcard тўлов тизими бизнес юритишнинг янги принципларига ўтмоқда. Бу ҳақда компания матбуот хизматига таяниб, Spot хабар берди.
«Ягона умумреспублика процессинг марказининг таъсисчилар таркиби ўзгарганидан сўнг бизнес юритиш стратегияси ҳам буткул ўзгариб, шериклар билан очиқлик, ҳамкорлик ва мақсадларга биргаликда эришиш учун ривожланиш тамойилларини баён қилади», — дейилади хабарда.
ЯУПМ ўз олдига чексиз хизмат қамрови билан технологик жамиятни бирлаштириш учун барқарор тизимни яратиш, шунингдек, шериклар учун қулай тариф сиёсатини жорий этиш мақсадини қўйган.
OpenAPI, биометрия ва дастурий таъминот технологияларининг жорий этилиши компанияга глобал ва очиқ молиявий хизматларнинг янги турларини яратишда ёрдам беради.
«Ушбу янги воситалар амалдаги тизимларга боғлиқ эмас, улар ҳуқуқий нормалар, шунингдек, очиқлик принципларига тўлиқ мос ҳолда иқтисодиётни ривожлантиради ва рағбатлантиради», — дейилади хабарда.
Янги стратегиянинг бир қисми сифатида компания янгиланган ва фойдали тарифлар сеткаси бўйича савдо эквайрингга уланиш жараёнлари очилганини эълон қилади.
«Шу орқали барча ҳамкор-иштирокчилар ҳар қандай турдаги шахсий бозор қурилмаларининг эквайринг инфратузилмасига уланиш имкониятига эга бўлади. Бундан ташқари, банкларга ўз пластик карталарини шахсийлаштириш имконияти берилади», — дейилади хабарда.
Эслатиб ўтамиз, май ойида Ойбек Турсунов Uzcard’нинг устав жамғармасидаги 75 фоиз улуш эгасига айлангани, қолган 25 фоиз улуш эса Uzcard ҳисобида қолгани ҳақида хабар берилган эди. 8 август ҳолатига кўра, компаниянинг 51 фоизи Ўзбекистон Миллий банкига, 6 фоизи «Саноатқурилишбанк»ка, 6 фоизи «Асака» банкига, 6 фоизи «Ипотека банк»ка ва яна 6 фоизи «Алоқабанк»ка тегишли.
Изоҳ (0)