Ўзбекистонда Хитойнинг Цзянси анъанавий табобат университетининг филиали ташкил этилади. Бу ҳақда Хитойнинг Beizhong Yilin Pharm Tech (Beijing) Co. Ltd. фармацевтика компанияси делегацияси ва Ўзбекистон соғлиқни сақлаш вазири Алишер Шодмонов ўртасида бўлиб ўтган учрашувда келишиб олинди, деб хабар бермоқда вазирлик.
Маълум қилинишича, 24 август, душанба куни соғлиқни сақлаш вазири Алишер Шодмонов Хитойнинг Beizhong Yilin Pharm Tech (Beijing) Co. Ltd. фармацевтика компанияси президенти Сюэжун Линь бошчилигидаги делегацияни қабул қилди. Фармацевтика компанияси ҳамда Цзянси анъанавий хитой табобати университетининг 10 нафар шифокор ва мутахассисисидан иборат делегациянинг мақсади Ўзбекистон тиббиёт ходимлари билан COVID-19 пандемиясига оид маълумотларни алмашиш, ҳамкорликда касаллик кенг тарқалишининг олдини олиш, уни назорат қилиш ва даволаш ишларига кўмаклашишдир.
Вазирлик томонидан қайд этилишича, 2019 йил апрель ойида Шавкат Мирзиёевнинг Хитойга ташрифи давомида соғлиқни сақлаш тизимида, хусусан, Ўзбекистонда анъанавий хитой табобатини ривожлантириш бўйича келишувга ҳам эришилганди.
Таъкидланишича, COVID-19’га қарши курашда Ўзбекистон Хитойнинг тўплаган катта тажрибасини қўллаши ва мамлакатлар саъй-ҳаракатларини бирлаштириш орқали пандемияни енгишига ишонч билдирилди. Ўз ўрнида Хитой ҳукумати томонидан мутахассислар кўмаги билан биргаликда Ўзбекистонга бир неча бор инсонпарварлик ёрдами етказиб берилгани айтилиб, чуқур миннатдорлик билдирилди.
Мулоқот давомида меҳмонлар анъанавий хитой табобатининг бугунги кунда коронавирусга қарши курашдаги аҳамияти хусусида батафсил гапириб берди, ушбу йўналишда Ўзбекистон билан кенг ҳамкорлик ўрнатиш масаласи муҳокама қилинди.
Жумладан, Ўзбекистонда Цзянси анъанавий хитой табобати университетининг филиалини ташкил қилишга келишиб олинди. Бу ерда тайёрланадиган мутахассислар халқ табобати илмини замонавий тиббиёт ютуқлари билан уйғунлаштирган ҳолда амалиётда қўллаши мумкин бўлади.
Эслатиб ўтамиз, 2020 йил апрель ойида «Ўзбекистон Республикасида халқ табобатини ривожлантиришга доир қўшимча чора-тадбирлар тўғрисида»ги Президент қарори қабул қилинганди. Қарорга кўра, Ўзбекистонда халқ табобати бўйича мутахассисларни тайёрловчи пуллик марказлар ташкил этилади.
Изоҳ (0)