«Барселона» ҳужумчиси Луис Суарес ёзги трансфер ойнасида жамоани тарк этиши мумкин.
RАC1 радиосининг хабар қилишича, «Барселона» янги бош мураббийи Рональд Куман футболчига қўнғироқ қилган ва янги мавсумда унга умид боғламаётганини айтган.
Суарес мавсумолди йиғинларининг санаси борасида ҳалигача жамоадан маълумот олмаган.
Яқин орада «Барселона» юристлари футболчининг агентлари билан учрашув ўтказади ва 2021 йилга қадар мўлжалланган шартномани бекор қилишга уриниб кўради.
Аввалроқ Суарес собиқ жамоаси «Аякс»га қайтиши мумкинлиги ҳақида хабарлар янграганди. Шунингдек, каталон клуби Луисни Донни ван де Бек трансферига қўшмоқчи бўлгани, бироқ уругвайлик футболчи бу таклифни рад этгани айтилганди.
«Барселона» 2014 йилда Суаресни «Ливерпуль»дан сотиб олганди. Футболчи июль ойида «Барселона» сафидаги 195-голини урган ва клуб тарихидаги энг яхши тўпурарлар рўйхатида учинчи ўринга кўтарилганди.
Суарес Ла Лига 2019/20 йилги мавсумида 28 ўйин ўтказиб, 16 гол ва саккизта голли узатмага муаллифлик қилди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)