Ижтимоий тармоқларда эри томонидан аёвсиз калтакланган аёл видеоси тарқалди. Ҳолат юзасидан Самарқанд шаҳри бўйича ИИО ФМБ ходимлари суриштирув олиб бориб, тасвирдаги воқеа иштирокчиларининг шахсини аниқлади. Бу ҳақда «Дарё»га Самарқанд вилояти ИИБ ахборот хизмати маълум қилди.
Хабар берилишича, жабрланган аёл Самарқанд шаҳрининг Термиз кўчасида яшовчи 1995 йилда туғилган М., уни калтаклаган фуқаро эса аёлнинг турмуш ўртоғи 1985 йилда туғилган Ш. исмли фуқаро бўлган.
М. ва Ш. 2012 йилда шаръий никоҳдан, 2015 йилда ФҲДЁ бўлимидан қонуний никоҳдан ўтган бўлиб, оилавий келишмовчилик сабаб эр хотинини доимий калтаклаб, қийноққа солиб келган.
«М. 2020 йилнинг 20 август куни ҳам турмуш ўртоғи Ш.ни сабабсиз, турли баҳоналар билан яшаётган уйида аёвсиз калтаклаб, оёқлари билан турли жойларига тепган ва тан жароҳати етказган», — дейилади вилоят ИИБ хабарида.
Таъкидланишича, эри томонидан доимий калтакланган аёл М. ва унинг икки нафар фарзанди Самарқанд шаҳри бўйича ИИО ФМБ томонидан ҳимояга олиниб, унга ИИБ ҳуқуқбузарликлар профилактикаси бошқармаси хотин-қизлар масалалари бўйича инспекторлари томонидан «Ҳимоя ордери» берилган. Малакали психологлар жалб қилинган ҳолда фарзандлари ва ўзига моддий ва маънавий ёрдам кўрсатилмоқда.
«Эри томонидан аёвсиз калтакланган аёл ИИБ назорати ва ҳимояси остида. Яшаш жойи, озиқ-овқатига ИИБ ходимлари ёрдам бермоқда. Аёлнинг соғлиғи ва аҳволи яхши», — дейди вилоят ИИБ ахборот хизмати раҳбари Жаҳонгир Саъдуллаев.
Самарқанд ИИБ ахборот хизматининг қўшимча қилишича, фуқаро Ш. турмуш ўртоғини ургани тасвирланган видео интернетда тарқалгач, уйидан қочиб кетган. 23 август, якшанба куни Тошкентда қўлга олиниб, Самарқандга олиб келинган.
Аёлни калтаклаган Ш.га нисбатан Самарқанд шаҳри бўйича ИИО ФМБ ҳузуридаги Тергов бўлими томонидан Жиноят кодексининг 105-моддаси (қасддан баданга ўртача оғир шикаст етказиш) билан жиноят иши қўзғатилиб, тергов ҳаракатлари олиб борилмоқда.
Жаҳонгир Саъдуллаевнинг маълумот беришича, ИИБ аёлни ишга жойлаштиришни ўз зиммасига олган. Шунингдек, Самарқанд шаҳар ҳокимлигига аёлни уй билан таъминлашни сўраб, зарурий ҳужжатларни тақдим этган.
«Дарё» мухбирининг аниқлик киритишича, аёлини калтаклаган эркакнинг отаси аввал «Сиёб» бозорининг раҳбари бўлган. Қайнота видео интернетда тарқалгач, аёлнинг қариндошлариникига бориб, видеони ижтимоий тармоқларга тарқатганларни излаган ва тўполон кўтарган. Муштумзўрнинг акаси эса босқинчилик жиноятини содир этгани учун айни пайтда ИИБ томонидан қидирилмоқда.
Изоҳ (0)