Тошкент шаҳар Бектемир тумани ҳокими Шоҳрух Мамажонов ўз лавозимидан озод қилинди. Сектор раҳбарлари — прокурор, ички ишлар бўлими бошлиғи ва давлат солиқ инспекцияси бошлиғи ҳам лавозимларини тарк этди. Бу ҳақда ҳукуматдаги манбага таяниб, «Gazeta.uz» хабар берди.
Президент Шавкат Мирзиёев 21 август куни Бектемир тумани фаоллари билан ўтган учрашувда туманда ишсизлик даражаси 3,3 фоиз, шу жумладан, аёллар орасида 1,7 фоиз, ёшлар ўртасида 1,5 фоиз эканини қайд этганди. Мактабгача таълим ташкилотлари етишмаслиги, қатор маҳаллаларда ички йўллар ҳолатининг ёмонлиги, коммунал тизимларда ҳам камчиликлар борлиги кўрсатиб ўтилган.
Шоҳрух Мамажонов Бектемир туманига 2018 йил июлдан буён раҳбарлик қилиб келаётган эди.
Нашрнинг хабар беришича, 2018 йил июль ойидан буён Яшнобод тумани ҳокими лавозимида ишлаб келаётган Ҳожиакбар Тиллашайхов ҳам ўз вазифасидан четлаштирилган.
Яқин вақт ичида Тошкентнинг Сергели, Яшнобод ва Бектемир туманларига янги ҳокимлар тайинланиши кутилмоқда.
Эслатиб ўтамиз, Шавкат Мирзиёев 21 август куни Тошкент шаҳар Бектемир туманида бажарилаётган ишлар, саноат корхоналари фаолияти билан танишди. Давлат раҳбари металл конструкциялар заводига, «Бинокор» масъулияти чекланган жамиятнинг ишлаб чиқариш майдонига, пишлоқ ишлаб чиқарувчи қўшма корхонага, тўқимачилик дастгоҳлари учун эҳтиёт қисмлар ишлаб чиқарадиган корхонага, «Ўзавтосаноат» томонидан ташкил қилинган Cooperation LAB тармоқлараро кооперация марказига ташриф буюрди. Cooperation LAB марказида саноат соҳаларида маҳаллийлаштиришни кенгайтириш масаласида йиғилиш ўтказилди. Давлат раҳбари туман фаоллари билан учрашди.
Изоҳ (0)