Ўзбекистоннинг Қирғизистондаги анклави Сўх туманидаги Чашма булоғи воқеаларида талафот кўрган хонадонлар 21 август, жума куни таъмирдан чиқарилиб, ўз эгаларига топширилди. Бу ҳақда ДХХ чегара қўшинлари матбуот хизмати хабар берди.
Эслатиб ўтамиз, 31 май куни Ўзбекистоннинг Сўх тумани Чашма қишлоғи ва Қирғизистоннинг Қадамжой тумани Чечме қишлоғи аҳолиси ўртасида Қирғизистон ҳудудида жойлашган, сувидан Ўзбекистон ҳам фойдаланадиган Чашма булоғи устида баҳс чиқиб, катта можарога айланиб кетганди.
Ушбу нохуш воқеаларда «Чашма» маҳалласида яшовчи фуқаролар Раҳматжон Тўхтасинов ва Равшанжон Тўхтаназаровнинг хонадонлари катта талафот кўргани сабабли ҳукумат томонидан бу хонадонларни тиклаш бўйича топшириқлар берилган эди.
Қайд этилишича, Раҳматжон Тўхтасиновнинг хонадони капитал таъмирланган бўлса, фуқаро Равшанжон Тўхтаназаровга янги уй қуриб берилган. Қурилиш-таъмирлаш ишларига давлат томонидан 600 миллион сўм маблағ йўналтирилди.
Изоҳ (0)