Андижон вилоятидаги ФҲДЁ архивларида 5 миллиондан ортиқ фуқаролик ҳолати далолатнома ёзувлари мавжуд бўлиб, шундан 3 миллионга яқини рақамлаштирилди. Бу ҳақда «Дарё»га Давлат хизматлари агентлиги Андижон вилояти бошқармаси ахборот хизмати хабар берди.
Давлат хизматлари агентлиги вилоят бошқармаси бошлиғи Маҳмуджон Абдижалиевнинг маълум қилишича, Президентнинг 2018 йил 12 июндаги «Фуқаролик ҳолати далолатномаларини қайд этиш тизимини янада такомиллаштириш чора-тадбирлари тўғрисида»ги қарорига асосан «Ягона электрон ФҲДЁ архиви» ахборот тизими яратилган. Ҳозирда уни юритиш ва ФҲДЁ органларида сақланаётган фуқаролик ҳолати далолатномалари ёзувларини рақамли кўринишга ўтказиш ҳамда ягона электрон ФҲДЁ архив фондини шакллантириш жараёни кетмоқда.
«Вилоятимиздаги ФҲДЁ органлари архивида жами 5 миллион 92 минг 810 дона далолатнома ёзувлари мавжуд бўлиб, шу кунга қадар «ФҲДЁ ягона электрон архиви» базасига 3 миллионга яқин далолатнома ёзувлари киритилиб, ҳужжатларнинг электрон кўринишга ўтиши таъминланди. Бунинг учун ҳар бир ҳудудда архивариус штати ташкил этилиб, энг замонавий ускуналар олиб келинди ҳамда махсус ахборот тизими ишга туширилди. Ҳозиргача Хонобод шаҳри, Бўстон, Улуғнор туманларида рақамлаштириш ишлари якунига етказилди», — дейди Маҳмуджон Абдижалиев.
Қўшимча қилинишича, ФҲДЁ ҳужжатларини рақамлаштириш ишларини тезроқ якунига етказиш учун вилоят бўйича 231 нафар фуқаро 4 ойлик шартнома асосида архивариусликка ишга олинган.
Эслатиб ўтамиз, Президент Шавкат Мирзиёев 2020 йил 4 август куни «Аҳолига давлат ижтимоий хизматлари ва ёрдам тақдим этиш тартиб-таомилларини автоматлаштириш бўйича қўшимча чора-тадбирлар тўғрисида»ги қарорни имзолаган эди. Унга кўра, 2021 йилнинг 1 январига қадар «ФҲДЁнинг ягона электрон архиви» ахборот тизимида ФҲДЁ органлари архивларида қоғоз ташувчиларда сақланаётган ҳужжатларнинг электрон базаларини шакллантиришни таъминлаш белгиланган. Шунингдек, Давлат хизматлари агентлигига 1 январга қадар «ФҲДЁнинг ягона электрон архиви» ахборот тизимидаги фуқаролик ҳолати далолатнома ёзувларига фуқароларга тегишли бўлган шахсий идентификация рақамини бириктириш орқали ариза берувчининг оила аъзолари таркибини аниқлаш функцияси жорий этилишини таъминлаш вазифаси юклатилган.
Мавзуга доир:
- «Судланганлик ҳақида маълумотнома бериш». ДХА Ўзбекистонда талаб юқори бўлган давлат хизматлари рўйхатини эълон қилди
- ДХА томонидан ер участкалари бўйича 2,3 мингдан ортиқ қонун бузилиши ҳолатлари аниқланди
- Ўзбекистонда «суюнчи пули»ни бола туғилган кундан бошлаб 6 ой ичида ДХМга мурожаат қилиш орқали олиш мумкин
Изоҳ (0)