Германиянинг етакчи тиббиёт мутахассисларидан бири, профессор, тиббиёт фанлари доктори Вернер Бер Ўзбекистонда одамларнинг ўз уйларида даволанишга интилишлари ва қўлланиши керак бўлмаган дори-дармонларни қабул қилишларини ачинарли ҳол деб айтди.
«Натижада улар оғир аҳволда реанимация бўлимларига ётқизилишини кузатдим», — деган у Соғлиқни сақлаш вазирлигига Ўзбекистондаги COVID-19 билан боғлиқ вазият ҳақида берган интервьюсида.
Ушбу инфекционист, микробиолог, Германиянинг микробиологик лабораторияларини аккредитация қилувчи органи (DAkkS)нинг эксперти бир ойдан бери ССВ қошидаги Коронавирусга қарши курашиш штабида бўлиб турибди ва Ўзбекистоннинг турли ҳудудларида коронавирусга чалинган беморларни самарали даволаш бўйича зарур тавсияларини бермоқда.
Унинг айтишича, ҳозир Ўзбекистондаги COVID-19 билан боғлиқ вазият Германияда 1-2 ой аввал бўлган вазиятга ўхшайди. Ушбу таққослаш имкониятининг ўзига хос афзалликлари ва ижобий томонлари мавжуд.
«Аслида бу менинг Ўзбекистонга иккинчи ташрифим. Биринчи марта май ойида келгандим. Ўша пайтдаги ва ҳозирги вазиятни таққослайдиган бўлсам, айни вақтда янги касалланиш ҳолатларининг қайд этилиши сезиларли даражада ошди. Шунингдек, ўз юртим ва Ўзбекистондаги ҳолатни таққослаш имкониятига эгаман. Германияда коронавируснинг биринчи қайд этилиши сизнинг мамлакатингизга қараганда олти ҳафта олдин бошланган. Яъни ҳозир Ўзбекистонда кузатаётганларим Германияда 1-2 ой аввал бўлган вазиятга ўхшайди. Ушбу таққослаш имкониятининг ўзига хос афзалликлари ва ижобий томонлари мавжуд. Чунки мен Германияда тўплаган тажрибамни маълум вақт силжиши билан мос равишда Ўзбекистонда қўллаш имкониятига эга бўлганимдан мамнунман.
Одамларнинг хатти-ҳаракатларини таҳлил қилсак, улар Германиядагига жуда ўхшаш. Яъни дастлаб одамлар вирус хавфини жиддий қабул қилишди, тартиб-интизомга қатъий риоя этишди. Аммо вақт ўтиши билан фуқаролар бўшашдилар: ораларидаги ижтимоий масофани сақламай, ниқобларни тўғри тақмай қўйишди. Мен ҳозир худди шунга ўхшаш вазиятни бу ерда ҳам кузатмоқдаман. Куни кеча меҳмонхона деразасидан шундай ҳолатни кузатдим: фаввора ёнида ёшлар ниқобни тўғри тақмаган ва ижтимоий масофани сақламаган ҳолда дам олишяпти.
Афсуски, Германияда одамлар тартиб-интизомга риоя қилишни унутган ўша пайтда вируснинг қайд этилиши анча ўсди. Вазиятдан фойдаланиб, юртингиз аҳолисини огоҳликка чақирмоқчиман. Агар орангизда шундай бефарқ одамлар кўпаядиган бўлса, 1-2 ой ичида касалликни янги юқтирганлар сони кескин ортиши мумкин. Шунинг учун ҳам эҳтиёт чораларига қатъий амал қилишлари зарурлигини айтмоқчиман. Вазиятни назорат қилиш одамларнинг ўз қўлларида», — дейди Вернер Бер.
Шифокор, шунингдек, антибиотикларни тартибсиз қабул қилиш ҳолатига ҳам тўхталиб ўтган.
«Дорихоналарингизда уларни бемалол сотиб олиш мумкин. Табиийки, уларни қабул қилиш кетма-кетлиги ва комбинацияси ҳам мутлақо бузилган. Масалан, Германияда, умуман, Европада пневмониянинг у ёки бу шаклини даволаш учун шунга мос кўрсатмалар мавжуд. Афсус билан айтиш лозимки, Европа давлатларида қабул қилинадиган антибиотикларнинг энг кучлиси Ўзбекистонда деярли биринчи навбатда қўлланилади. Яъни бу ерда даволанишни, баъзида эса ҳатто профилактикани ҳам деярли резерв антибиотиклардан бошлашади», — дейди профессор.
Аввалроқ соғлиқни сақлаш вазири Алишер Шодмонов коронавирусга қарши кураш масаласида Ўзбекистонга келган германиялик мутахассислар билан мулоқот ўтказгани хабар берилган эди.
Эслатиб ўтамиз, Ўзбекистонга шу вақтгача коронавирусга қарши курашда ёрдам бериш учун 10 нафар германиялик, 15 нафар хитойлик шифокор ва тиббиёт мутахассисидан иборат гуруҳ, таркибида анестезиолог, реаниматолог, юқумли касалликлар бўйича мутахассис, эпидемиолог, терапевт ва кардиолог бор 40 нафар россиялик шифокор келган бўлса, март ойининг охиридан бошлаб Ўзбекистонда кореялик профессор — эпидемиолог Цой Чже Ук, яна бир кореялик анестезиолог-реаниматолог, бир қанча туркиялик мутахассислар, Германиянинг етакчи тиббиёт мутахассисларидан бўлмиш профессор Вернер Бер фаолият юритган.
Изоҳ (0)