Президент Шавкат Мирзиёев Бектемир туманидаги «Бинокор» масъулияти чекланган жамиятнинг ишлаб чиқариш майдонига ташриф буюрди. Бу ҳақда Президент матбуот хизмати хабар берди.
Давлат раҳбарининг туманга аввалги ташрифи чоғида бу корхона фаолияти ҳақида тақдимот ўтказилган эди. Умумий қиймати 50 миллион доллардан зиёд бўлган лойиҳанинг биринчи босқичи 2018 йилда ишга туширилган. Бугунги кунда иккинчи босқичи фаолият бошлаш арафасида.
Бунинг учун янги мажмуага Германиянинг Vollert, Würschum, Италиянинг Maema, Schnell, AWM, Россиянинг «Точная Строителная Механика», «Грузоподем», Польшанинг Airpol ва Испаниянинг Azcona Y Pantoja SL компаниялари билан ҳамкорликда замонавий технология ва дастгоҳлар келтириб ўрнатилган.
«Бинокор» корхонасида тайёрланаётган темир-бетон панеллар кўп қаватли уйлар ва бошқа иншоотлар қуришда қўлланилмоқда. Ҳозиргача бу ерда 1 минг 200 дан зиёд муҳандис ва мутахассислар ишлаб, йилига 150 минг квадрат метр маҳсулот ишлаб чиқараётган эди. Корхона тўлиқ қувватга чиққач, йилига яна 180 минг квадрат метр қурилиш панели тайёрланиб, қўшимча 670 та иш ўрни яратилади.
Президент корхона фаолияти билан танишар экан, масъулияти чекланган жамиятнинг моддий-техник базасидан фойдаланиб, бу ерда ўқув-амалиёт комбинати ташкил этиш бўйича кўрсатма берган.
«Мамлакатимизда катта-катта қурилишлар бўляпти, яна режалар кўп. Ёшларга замонавий қурилиш технологиялари бўйича етарли малака берсак, даромадлари ҳам икки-уч баробар ошади», — дейди давлат раҳбари.
Шу ерда 2020—2022 йилларда Тошкент шаҳри ҳамда Бектемир туманида амалга ошириладиган экспорт ва инвестиция лойиҳалари бўйича маълумот берилган.
Аввалроқ Шавкат Мирзиёев 21 август куни Тошкент шаҳрининг Бектемир туманида бажарилаётган ишлар, саноат корхоналари фаолияти билан танишаётгани, Президент дастлаб «Бектемир металл конструкциялари» масъулияти чекланган жамият заводига боргани тўғрисида хабар берилганди.
Изоҳ (0)