Тошкентнинг Юнусобод туманидан ўтувчи Аҳмад Дониш кўчасида йўл-қурилиш ишлари давом этаётгани, узунлиги 2,2 километрни ташкил этадиган йўл оралиғида пиёдалар йўлаги, велойўлаклар, яшил ҳудуд ва шунга ўхшаш яна бир қатор лойиҳаларни қуриш бошлангани тўғрисида хабар берилганди. Туман ҳокимлиги матбуот хизматининг маълум қилишича, ҳозирда кўча ёқасида жойлашган кўп қаватли уйлар атрофи тозаланмоқда.
Бундан ташқари, кўчада жойлашган пешлавҳа ва рекламалардаги ёзувларни бехато ёзилганлигига эътибор қаратилмоқда.
«Айниқса, ёзув давлат тилида бўлишига эътибор қаратилганлиги муносабати билан рекламалар давлат тилига ўгирилмоқда. Шунингдек, ушбу ҳудудда болалар майдончаси, дам олиш ўриндиқлари таъмирланиб, дарахтларга шакл бериш ва бу ерни яшил ҳудуд қилиш борасида ишлар амалга оширилмоқда», — дейилади хабарда.
Аввалроқ Юнусободда Megaplanet олдидаги чорраҳа 94 метргача кенгайтирилиши тўғрисида хабар берилганди.
Эслатиб ўтамиз, июнь ойида Тошкент метросининг «Юнусобод» йўлидаги 2 та янги бекат қуриб битказилган эди. Метронинг янги йўналишлари Аҳмад Дониш кўчасидан ўтган. Кўчани таъмирлаш ишлари метро йўналишлари якунланганидан сўнг бошланган. Қурилиш ишлари уч босқичда амалга оширилиб, илк жараён сентябрь ойида якунланиши кутилмоқда.
Изоҳ (0)