Наманган шаҳридаги «Баркамол авлод» спорт мажмуасида ташхислаш ва саралаш маркази фойдаланишга топширишга шай ҳолга келтирилди. Бу ҳақда «Дарё» мухбири Азизбек Абдувалиев хабар бермоқда.
500 ўринга мўлжалланган марказда 20 ўринли реанимация бўлими ташкил этилди. Қолган хоналарнинг барчаси кислород етказиб берувчи тармоқларга уланган.
— Коронавирус инфекциясига дучор бўлган беморлар кўпинча ҳаво етишмаслигидан қийналади. Марказда эса бундай ҳолат кузатилмайди. Чунки палаталар нафас олишга кўмак берувчи тиббиёт асбоблари билан таъминланган. Жонлантириш бўлимига эса янада такомиллашган аппаратуралар ўрнатилган, — дейди реаниматолог Санжарбек Асқаралиев.
Республика ихтисослаштирилган кўз микрохирургияси илмий-амалий тиббиёт маркази директори, тиббиёт фанлари доктори Азамат Юсуповнинг сўзларига кўра, марказ коронавирус инфекциясини юқтириб олганлар сони бирдан ортиб кетиши кузатилган вазиятларда асқотади. Шунинг учун ҳам бу ер энг замонавий тиббиёт асбоб-ускуналари билан жиҳозланган.
Айни пайтда марказда хизмат қиладиган 20 нафар шифокор, 80 нафар ҳамшира ва 20 нафар ёрдамчи ходимни танлаш ҳамда тайёрлаш ишлари олиб борилмоқда.
Изоҳ (0)