Сурхондарё вилояти Қумқўрғон туманида коврак йиғувчи МЧЖ ишчиларига маҳаллий аҳоли томонидан ҳужум уюштирилди. Бу ҳақда ИИВ ҳузуридаги Тергов департаменти хабар қилган.
Департамент ахборот хизматининг ёзишича, 2020 йилнинг 8 август куни соат 10:00 да Қумқўрғон тумани «Саховат» маҳалласидаги тоғли ҳудудда бўлган коврак ширасини йиғувчи МЧЖ ишчилари 32 ёшли А.Б., 39 ёшли З.М. ва А.Ж.га ҳужум қилинган.
Улар ҳудудда ишлаётган вақтида бу ерга 40 ёшли Б.Ч. ва 41 ёшли Х.Ч. тахминан 15 нафар нотаниш фуқаролар билан биргаликда келиб, қўлида бўлган таёқ билан уларни савалаб, турли тан жароҳатлари етказган.
Тўда «Бу ерда ишламайсанлар, тоққа қайтиб чиқсанг, ўлигинг тушади», деб уларни қўрқитган. Шунингдек, жиноий тўда МЧЖга тегишли жами 20 дона елим идишдаги қиймати 168 миллион сўм бўлган 105 килограмм коврак шираси ва нархи 1 миллион 100 минг сўмлик 20 килограмм қовурилиб елим идишга солиб қўйилган қўй гўшти, 2 дона афғон пичоғи, икки дона 100 литр ҳажмли елим идиш ва А.Б.га тегишли нархи 1 миллион сўмлик Samsung Ж5 телефон аппаратини тортиб олиб, ҳодиса жойидан яширинган.
«Ҳодиса содир бўлган жойдан бир дона синган таёқ бўлаги ва бир дона бутун ҳолдаги чўпон таёғи ашёвий далил тариқасида расмийлаштириб олинган.
Мазкур ҳолат юзасидан Қумқўрғон тумани ИИБ ҳузуридаги тергов бўлими томонидан Жиноят кодексининг 166-моддаси 2-қисми «а,в» бандлари (талончилик) билан жиноят иши қўзғатилган. Ҳозирда дастлабки тергов ҳаракатлари олиб борилмоқда», – дейилади департамент хабарида.
Мавзуга доир:
- ДХХ чегара ҳудудида ўсадиган каврак ўсимлигини йиғиб олиш тартиби ҳақида маълумот берди
- Сурхондарёда ноёб ўсимлик смоласини йиғиш учун рухсатнома олиб бермоқчи бўлиб 170 минг долларни олган фуқарога жиноят иши қўзғатилди
- Сурхондарёда ноёб каврак ўсимлиги ширасини ноқонуний йўл билан ўзлаштираётганлар қўлга олинмоқда
Изоҳ (0)