Хоразмдаги «Ҳазорасп» эркин иқтисодий зонаси кенгайтирилади

«Ҳазорасп» эркин иқтисодий зонаси (ЭИЗ) қишлоқ хўжалигида фойдаланилмаётган бўш турган ер участкалари ҳисобидан кенгайтирилади, деб хабар бермоқда «Gazeta.uz». Бу ҳақда Президентнинг Хоразм вилоятида тадбиркорликни ривожлантириш ва унинг инвестициявий жозибадорлигини ошириш чора-тадбирлари тўғрисидаги 17 августдаги қарорида кўзда тутилган.

«Ҳазорасп» ЭИЗ Президент фармони билан 2017 йилнинг 12 январида фаолият юритиш муддатини кейинчалик узайтириш имконияти билан 30 йил муддатга ташкил этилган. Ушбу давр мобайнида давомида ЭИЗ ҳудудларида махсус солиқ, божхона ва валюта режими амал қилади.

Кенгайтирилган ҳудудларда замонавий рақобатбардош, импорт ўрнини босувчи, экспортга йўналтирилган тайёр саноат маҳсулотларини ишлаб чиқаришга мўлжалланган ишлаб чиқариш қувватларини босқичма-босқич жойлаштириш режалаштирилмоқда.

Қарор билан Хоразм вилояти ҳокимлиги ҳузурида юридик шахс ташкил этмасдан Инфратузилма жамғармаси ташкил этиш кўзда тутилган. Жамғарма маблағлари «Ҳазорасп» эркин иқтисодий зонасининг кенгайтирилган ҳудудларида инфратузилма қурилишини молиялаштиришга йўналтирилади.

Тикланиш ва тараққиёт жамғармаси маблағлари ҳисобидан «Ҳазорасп» эркин иқтисодий зонасининг кенгайтирилган ҳудудларида муҳандислик-коммуникация инфратузилмаси объектларини қуриш учун Khorezm Invest Project инвестиция компаниясига 10 йил муддатга 2,5 фоиз ставкасида 13 миллион доллар миқдорида маблағлар ажратилади.

Устав фонди дастлаб 30 миллион доллар (кейинчалик 100 миллион долларгача оширилувчи) миқдорида бўлган Инвестиция компанияси NBU Invest Group, «Ўзсаноатқурилишбанк» АТБнинг PSB Capital ҳамда «Асака» АТБнинг Asaka Capital Invest инвестиция компаниялари таъсисчилигида шакллантирилган.

Қарорда, шунингдек, Хоразм вилоятида 2020—2022 йилларда амалга ошириладиган умумий қиймати 2,2 триллион сўмлик 84 та инвестиция лойиҳаси ҳамда умумий қиймати 516,8 миллион долларлик 26 та истиқболли инвестиция лойиҳаси рўйхати тасдиқланган.

Истиқболли 26 та йирик инвестиция лойиҳаси ва Хоразм вилоятининг ҳар бир туманида қўшимча янги саноат ишлаб чиқариш лойиҳалари 2021 йил 1 апрелга қадар ишга туширилиши режалаштирилган.