Озарбайжон президенти Илҳом Алиев 18 август, сешанба куни Ўзбекистоннинг мазкур мамлакатдаги янги элчиси Баҳром Ашрафхоновдан ишонч ёрлиғини қабул қилди. Бу ҳақда Озарбайжон президенти матбуот хизмати хабар берди.
Таъкидланишича, Ўзбекистон элчиси Озарбайжон президентига ишонч ёрлиғини топширган. Шундан кейин элчи ва президент ўртасида мулоқот бўлиб ўтган.
Хабарда таъкидланишича, коронавирус пандемияси сабабли Озарбайжон президентининг Ўзбекистонга режалаштирилган ташрифи бекор қилинган. Илҳом Алиев эпидемиологик вазият имкон бериши билан Ўзбекистонга ташрифини амалга оширишини маълум қилди.
Шунингдек, Илҳом Алиев Арманистон ва Озарбайжон чегарасида 12 июлда юзага келган можаро сабабли Ислом ҳамкорлик ташкилоти ва Туркий тилли давлатлар ҳамкорлиги кенгаши доирасида тегишли баёнотлар қабул қилинишини аъзо давлат сифатида қўллаб-қувватлагани учун Ўзбекистонга миннатдорлик билдирди.
Эслатиб ўтамиз, Ўзбекистоннинг Озарбайжондаги фавқулодда ва мухтор элчиси этиб тайинланган Баҳром Ашрафхонов 2020 йилнинг 14 апрель куни Тошкентдан Бокуга етиб борганди.
Баҳром Ашрафхонов 1969 йилда туғилган. 1990 йилда Тошкент политехника институтини, 1993 йилда Тошкент давлат иқтисодиёт университети ва 1994 йилда АҚШдаги Кентукки университетини тамомлаган.
У 2016—2018 йилларда Ўзбекистоннинг Россиядаги фавқулодда ва мухтор элчиси, 2018 йил сентябрь ойидан 2019 йил февралигача «Ўзбекнефтгаз» компанияси бошқарув кенгаши раиси вазифасини бажарувчи, 2019 йилнинг февраль ойидан сентябрга қадар молия вазирининг ижтимоий масалалар бўйича ўринбосари лавозимида фаолият олиб борган. 2019 йилнинг сентябрь ойидан 2020 йил март ойига қадар Баҳром Ашрафхонов Пенсия жамғармасининг ижро этувчи директори вазифасида ишлаган.
Изоҳ (0)