Ўзбекистонга Хитойдан 10 нафар тиббиёт мутахассислари келиши кутилмоқда. Бу ҳақда АОКА залида ташкил этилган брифингда Коронавирусга қарши курашиш штаби аъзоси Рустам Икромов маълум қилди.
«Улар ҳам ўз мамлакатларида олиб борган ишларидан орттирган тажрибаларини ўргатиб кетадилар ва бу соҳада уларнинг бизга кўмаги беқиёс бўлади, деб ўйлайман», — дейди мутахассис.
Мутахассислар коронавирусга чалинганларни даволаш муассасаларида ўзбекистонлик шифокорлар билан ҳамкорликда иш олиб бориши кўзда тутилмоқда.
Эслатиб ўтамиз, Ўзбекистонга шу вақтгача коронавирусга қарши курашда ёрдам бериш учун 15 нафар хитойлик шифокор ва тиббиёт мутахассисидан иборат гуруҳ, таркибида анестезиолог, реаниматолог, юқумли касалликлар бўйича мутахассис, эпидемиолог, терапевт ва кардиолог бор 40 нафар россиялик шифокор келган бўлса, март ойининг охиридан бошлаб Ўзбекистонда кореялик профессор — эпидемиолог Сой Чже Ук, яна бир кореялик анестезиолог-реаниматолог, бир қанча туркиялик мутахассислар, Германиянинг етакчи тиббиёт мутахассисларидан бўлмиш профессор Вернер Бер фаолият юритган.
Изоҳ (0)