Ўзбекистонда бу йилги кириш имтиҳонларида абитуриентларнинг ота-оналари учун алоҳида кутиш жойлари ташкил қилинмайди

Ички ишлар вазири матбуот котиби Шоҳрух Ғиёсов 2020/2021-ўқув йили учун кириш имтиҳонларида абитуриентларнинг ота-оналари учун кутиш жойлари ташкил этилмаслигини маълум қилди. Бу ҳақда у АОКА залида ташкил этилган брифингда айтиб ўтган.

«Ота-оналар ва яқинлар учун алоҳида кутиш жойлари ташкил қилинмайди. Тест ўтказиладиган жойларга олиб келувчи автомобиль йўллари камида 1,5 км радиус масофада бетон тўсиқлар ёки юк автотранспорти билан тўсилади. Ушбу ҳудудларда ҳаракатланиш вақтича чекланади. Фуқаролар ва автотранспорт воситалари тўпланишига йўл қўйилмайди. Абитуриентлардан ва ота-оналардан олдиндан шундай чеклов чораларига тайёргарлик кўришларини сўраб қоламиз», — дейди Ғиёсов. Чеклов ўрнатилиши муддати қўшимча равишда ОАВ орқали эълон қилинади.

Абитуриент ўзи билан ортиқча нарса олиб келмаслик сўралди. Фақат шахсини тасдиқловчи ҳужжат бўлиши лозим. Синов ўтказиладиган жойда улар сув, қалам, тегишли жиҳозлар, тиббий ниқоб билан таъминланади.

Абитуриентлардан тест топшириш жойларига камида 1 соат олдин келишлари талаб этилади. Ҳозирда маҳаллий ҳокимликлар томонидан абитуриентлар учун алоҳида автобусларни ташкил этиш масаласи кўрилмоқда. Натижаси юзасидан қўшимча равишда ахборот берилади.

Эслатиб ўтамиз, 2020 йилда Ўзбекистондаги олий таълим муассасаларига (ОТМ) бакалавриат босқичига 162 364 та, магистратурага 10 425 та ўрин ажратилган. Кириш имтиҳонлари икки сменада республика бўйича танлаб олинган 155 та стадионнинг 40 тасида ўтказилади. Олий ўқув юртларига кириш тест синовлари 2 сентябрдан бошланиб, 14 кун давом этади, бакалавр босқичининг 1, 2, 3, 4-босқич талабаларига ҳозирча сентябрь ойидан бошлаб масофавий таълим бошланади.

Республика Таълим муассасаларига ўқишга қабул қилиш бўйича Давлат комиссиясининг қарорига мувофиқ, тест синовлари билан бир қаторда касбий (ижодий) имтиҳонлар ўтказиладиган бакалавриат таълим йўналишлари бўйича касбий (ижодий) имтиҳонлар аввалги йилларда олинган мос фан бўйича тест синовлари билан алмаштирилган.

Аввал абитуриентларга ҳар 30 та тест топшириғини ечиш учун (жавоблар варақасини тўлдириш билан бирга) 90 дақиқа (60 та тест топшириғига жами 180 дақиқа берилади) вақт ажратилади.