Ўзбекистондаги iOS фойдаланувчилари ёппасига VPN-иловаларни ўрнатишни бошлади

Ўзбекистонлик iOS фойдаланувчилари ёппасига VPN-иловалар ўрнатишни бошлади. Бу ҳақда App Annie мобил таҳлил сервисининг маълумотларига таяниб, Spot хабар берди.

17 август ҳолатига келиб бешта энг кўп юклаб олинган иловалардан нақ тўрттаси — VPN. Бундай ҳолат сўнгги уч йилда илк бора кузатилмоқда. Android фойдаланувчилари томонидан VPN’ни юклаб олиш даражаси бу қадар юқори эмас.

Июль ойининг бошларида мобил VPN яна фойдаланувчилар ўртасида машҳурлаша бошлагани, бу ҳодиса Facebook ижтимоий тармоғига уланишда муаммолар юзага келиши билан бир вақтда содир бўлгани тўғрисида хабар берилганди.

Август ойидан бошлаб эса айрим фойдаланувчилар Instagram’га уланишда ҳам муаммолар юзага келаётганини хабар бера бошлади. Буни Downdetector сервиси маълумотлари ҳам тасдиқламоқда.

Июль ойида Ахборот технологиялари ва коммуникацияларини ривожлантириш вазирлиги Facebook билан боғлиқ вазиятга изоҳ бериб, вазирлик ҳеч қандай чекловлар ўрнатмаётганини маълум қилганди. Август ойида Миллий оммавий ахборот воситаларини қўллаб-қувватлаш ва ривожлантириш жамоат фонди Васийлик кенгаши раиси Комил Алламжонов Facebook’ка киришда дуч келинаётган муаммога яна бир бор тўхталиб ўтганди.

Бу – Ўзбекистонда сайтларга уланиш мураккаблашиши фонида VPN’нинг оммалашувига доир биринчи ҳолат эмас. 2018 йил августида ҳам худди шундай вазият юзага келиб, муаммо 2019 йилнинг январида барҳам топганди.

Ўтган йилнинг августида ўша пайтда Ахборот ва оммавий коммуникациялар агентлиги директори вазифасида ишлаб турган Комил Алламжонов Alter Ego дастури доирасида блогер Кирилл Альтманга берган интервьюсида агентлик бунинг учун ўз ҳиссасини қўшганини айтган эди. Facebook ва YouTube’ни блоклаганлар кимлар, дея берилган саволга Алламжонов «улар аллақачон қамоқхонада ўтиргани»ни айтиб жавоб берган эди.

Алламжонов, шунингдек, VPN барча хавфсизлик тизимларини бузиб юборишига диққат қаратган эди. Агар барча ёппасига VPN ишлата бошласа, давлатда, масалан, наркотик савдоси билан шуғулланишни тарғиб қилувчи ёки турли аксилконституцион ҳаракатларга чорловчи террористик сайтларга киришни назорат қилиш воситаси қолмайди, деган эди айни пайтда Миллий масс-медиа фондига раҳбарлик қилаётган Комил Алламжонов.