«Ўзбекистон темир йўллари» ва Uzbekistan Airways раҳбарларига хизматлар сифатини ошириш бўйича топшириқ берилди

Бош вазир ўринбосари Сардор Умрзоқов раҳбарлигида транспорт соҳасини ислоҳот қилишга бағишланган видеоконференция шаклида йиғилишда ўтказилди.

Инвестициялар ва ташқи савдо вазирлиги матбуот хизмати хабарига кўра, 16 август куни ўтказилган ушбу йиғилишда Инвестициялар ва ташқи савдо вазирлиги, Транспорт вазирлиги, «Ўзбекистон темир йўллари» АЖ, Uzbekistan Airways АЖ, Uzbekistan Airports АЖ, Давлат активларини бошқариш агентлиги, Давлат-хусусий шерикликни ривожлантириш агентлиги, Монополияга қарши курашиш қўмитаси ва бошқа тегишли идора ва ташкилотлар раҳбарлари иштирок этди.

Унда темир йўл транспорти ва фуқаро авиацияси соҳаларини янада такомиллаштириш бўйича мақсадли кўрсатмалар берилди.

Хусусан, Транспорт вазирлиги ва «Ўзбекистон темир йўллари» АЖга миллий темир йўл тизимини тубдан ислоҳ қилиш концепциясини ишлаб чиқиш вазифаси топширилди. Концепцияда соғлом рақобат муҳитини яратиш, транспорт жараёнларини такомиллаштириш ва тариф сиёсатининг шаффофлигини ошириш, замонавий корпоратив бошқарувни жорий этиш ва иш жараёнларини рақамлаштириш мақсадида темир йўл ташувларига хусусий операторларни жалб этиш чоралари назарда тутилади.

Бундан ташқари, Транспорт вазирлиги, Uzbekistan Airways АЖ ва Uzbekistan Airports АЖ раҳбарларига тарифларни оптималлаштириш, хизматлар сифатини ошириш, юк ташишни ривожлантириш ва тегишли инфратузилмани замонавийлаштириш, шунингдек, фуқаро авиацияси соҳасида давлат-хусусий ҳамкорликни кенгайтириш бўйича аниқ таклифлар ишлаб чиқиш топширилди.

Аввалроқ Тошкент, Бухоро, Фарғона ва Урганч аэропортлари давлат-хусусий шерикликка берилиши, Самарқанд аэропорти 62 миллион долларга реконструкция қилиниши, у китоб шаклида бўлиши хабар берилган эди.