Қозоғистон Соғлиқни сақлаш вазирлигининг расмий вакили Багдат Кожаҳметов нима сабабдан коронавирусга қарши вакцина Қозоғистоннинг барча фуқаролари учун бепул бўлмаслигини маълум қилди. Бу ҳақда Tengrinews хабар берди.
Журналист вазирлик вакилидан нима сабабдан COVID-19’га қарши вакцина фақат мамлакат аҳолисининг 10 фоизини ташкил қиладиган хавф гуруҳидаги аҳоли учун бепул бўлишини сўраган. Шунингдек, журналист мамлакат фуқароларини Мажбурий тиббий суғурта жамғармаси ҳисобидан эмлашни таклиф қилган.
«Анъанавий хавф гуруҳи мавжуд, уларнинг сони Қозоғистонда 2,2 миллион кишини ташкил қилади. Улар юрак-қон томир тизимида сурункали касалликлари бўлганлар, жумладан, 65 ёшдан катта фуқаролар, қандли диабет ва бошқа шу каби касалликлари бўлган кишилар ҳисобланади. Шунинг учун соғлом одамлар бу рўйхатга киришга уриниши керак ёки йўқлигини билмайман. Аниқ ижтимоий қоидалар ва қонунлар бор-ку», — дея таъкидлаган вазирлик расмий вакили.
Унинг сўзларига кўра, ишлаётган соғлом одам ўзини ўзи таъминлаши керак, шу жумладан, вакцина билан ҳам.«Бу менинг шахсий позициям. Ўйлайманки, кўплаб ақлли фуқаролар менинг фикримга қўшилади», — дея қайд этган масъул.
Аввалроқ Багдат Кожаҳметов Қозоғистон клиник синовларнинг барча босқичлари якунланмагунча COVID-19 вакцинасини сотиб олмоқчи эмаслигини маълум қилганди.
Эслатиб ўтамиз, Россияда 11 август куни коронавирусга қарши вакцина рўйхатга олинганини Владимир Путин эълон қилди. Россия томонидан ишлаб чиқарилаётган вакцина камида 10 АҚШ долларидан сотилиши мумкинлиги ҳақида маълум қилинган. Мазкур вакцина учинчи босқичда ўн минглаб одамларда синовдан ўтказилади.
Изоҳ (0)