Испания Қироллик уйи август ойида мамлакатни тарк этгани хабар қилинган собиқ қирол Хуан Карлоснинг БАА ҳудудида яшаётганини маълум қилди.
«Дон Хуан Карлос жаноби олийлари қирол Фелипе VI зоти олийларининг оиласига 3 августдан Бирлашган Араб Амирликларида яшай бошлаганини билдирган», – дейилади хабарда.
Бунгача Испания собиқ қиролининг қаерда экани юзасидан расмий ахборот берилмай келаётганди. ОАВда Хуан Карлоснинг Португалия ёки Доминикан Республикасида экани тахмин қилинган, кейинчалик қирол Фелипе VI нинг отаси БААда бўлиши мумкинлиги ҳақидаги хабарлари тарқалганди.
Ўтган ҳафтада Испания ҳукумати раиси Педро Санчес монарх Хуан Карлоснинг қаерда экани юзасидан берилган саволга жавоб беришни истамаган ва бу Қироллик уйининг махфий маълумоти эканини билдирган.
Хуан Карлоснинг Испаниядан бошқа жойга кўчиши тўғрисида 3 августда расман маълум қилинган ва ушбу воқеа Саудия Арабистони қироллигидан Макка ҳамда Мадина оралиғидаги қурилишга испан темир йўл қурилиши компанияларини жалб қилиш учун пора олиш билан боғлиқ можарога алоқадорлиги айтилганди. Олий суд прокуратураси бу борада тергов олиб бормоқда ва расмий айблов эълон қилинмаган.
Хуан Карлоснинг адвокатлари унинг зарурат туғилса, судда кўрсатма беришга тайёрлигини қайд этган.
Хуан Карлос 2014 йил июнь ойида ўғли Фелипе VI тахтга ўтириши учун ўз ваколатларидан воз кечган. Март ойида Фелипе VI отасининг қироллик уйи бюджети маблағларини сарф қилиш имконидан маҳрум қилган, шунингдек, меросдан ҳам воз кечган.
Изоҳ (0)