Британиялик иқлимшунос олимлар 2035 йилга бориб Арктика мутлақ музсиз қолишини маълум қилди. Уларнинг тадқиқот натижалари Nature Climate Change илмий журналида чоп этилган.
Таъкидланишича, экспертлар бу каби хулосага сайёранинг шимолий қисмидаги ҳолатнинг Ер тарихидаги сўнгги иссиқ даврни — 125 минг йил олдинги шароитни таҳлил қилиш орқали келган.
«Арктика глобал исиш таъсири остида жуда ҳам ўзгаришга учраётганини биламиз... 2035 йилга бориб Арктика муз қопламасисиз қолишининг ўзи инсониятни глобал исишга қарши фаолроқ курашишга мажбур қилиши керак», — дейди мақола муаллифларидан бири, Британия антарктика хизмати иқлимшуноси Луиза Сайм.
Дунё иқлимшунослари глобал исиш мавжудлигига ва ҳарорат кўтарилиши 1,5 даражага пасайтирилмаса, у сайёра кўринишини бутунлай ўзгартириб юборишига ишонмоқда.
Тадқиқот муаллифлари бунга дунёнинг асосий сиёсатчиларини жалб этиш ва уларни иқлим муаммоларига қарши курашда янги чораларни амалга оширишга мажбур этиш ниятида эканликларини маълум қилган.
Аввалроқ сўнгги уч ўн йилликда Жанубий қутбдаги ҳарорат глобал ўртача кўрсаткичдан уч бараварга кўтарилгани тўғрисида хабар берилганди.
Изоҳ (0)