Коронавирусга қарши кураш штаби аъзоси Ўзбекистонда оғир аҳволдаги беморлар сони нега кўпаяётганига изоҳ берди
Беморларнинг вақтида шифокорга мурожаат қилмаслиги, яъни коронавирус инфекциясининг бошланғич симптомларига эътибор бермаслик ва уй шароитида ўз-ўзини даволаши оғир аҳволдаги беморлар сонининг ортиб кетишига сабаб бўлмоқда. Бу ҳақда «Шифобахшуз» каналида коронавирусга қарши кураш штаби аъзоси Наргиза Нуриллаева маълум қилди.
Расмий статистика бўйича, Ўзбекистонда коронавирусга чалинган ва бир вақтда даволанаётган беморлар сони 30 июль куни соат 10:00 ҳолатига кўра, энг юқори нуқтага чиққан — 9 803 нафар. Ўшанда ушбу беморлардан 537 нафари — 5,4 фоизининг аҳволи оғир (орасида яна қанчаси ўта оғир) деб баҳоланаётгани айтилган эди.
11 август соат 10:00 ҳолатига кўра, коронавирусга чалинган ва бир вақтда даволанаётган беморлар сони 8 351 нафарни ташкил этмоқда. Яъни айни вақтда даволанаётган беморлар сони 30 июлдагидан салкам 1,5 мингтага кам. Лекин уларнинг 1748 нафари — салкам 21 фоизи оғир аҳволда.
Коронавирусга қарши кураш штаби аъзоси Наргиза Нуриллаева коронавирусга чалинган беморлар сони камайгани сайин, оғир аҳволдаги беморлар сони каррасига кўпаяётганига изоҳ берди:
Мутахасиснинг маълум қилишича, бунинг биринчи сабаби – беморларнинг вақтида врачга мурожаат қилмаслиги, яъни коронавирус инфекциясининг бошланғич симптомларига эътибор бермаслик ва уй шароитида ўз-ўзини даволаш.
«Иккинчиси, ўзи оддий пневмония шунақа хавфли касалликки, баъзиларда кам симптомли ўтиши ҳам мумкин. Айниқса, коронавирус пневмонияси бир хил инсонларда яширин ўтмоқда. Лекин етакчи симптомлар пайдо бўлади: ҳолсизлик, кам-кам, қуруқ йўтал ва кўкрак қафасида нохуш сезгилар. Шу сабабли бемор билмасдан, ўзига эътибор бермасдан юради. Афсуски, касаллик кучайгандан кейин шифокорга мурожаат қилади. Бу ҳам касалликни оғир даражаси кўпайишига сабаб бўлади. Кекса ёшдаги беморларимизнинг ҳам кўплиги бунга сабаб бўлмоқда. Уларда кўпроқ пневмониянинг атипик кечишини кузатиш мумкин», – деди Наргиза Нуриллаева.
Унинг алоҳида таъкидлашича, коронавирус пневмониясида сурункали касалликлар сабаб бўлмоқда: бронх ва ўпка касалликлари, бронхиал астма, юрак қон-томир касалликлари. Шу касалликларга чалинган беморларда коронавирус қўшилиши оқибатида ҳам касаллик оғир ўтмоқда.
«Шуни қўшимча қилиб айтиш мумкинки, карантин юмшатилган вақтда фуқароларнинг чекловларга тўла риоя қилмаслиги натижасида ҳам касалланганлар сони ортиб кетди» – деди у.
Аввалроқ Ўзбекистонда 15 августдан автомобилларнинг кун давомида ҳаракатланишига ва 30 кишилик тўй-маросимларни ўтказишга, 17 августдан эса вилоятлараро қатновлар ва диний ташкилотлар фаолиятига, 20 августдан эса буюм бозорлари ва савдо мажмуалари қайта ишга тушишга рухсат берилиши айтилган.
